El Grupu Municopal d'Izquierda Xunida n'Uviéu ta acabante presentar una proposición urxente pal so alderique nel plenu próximu. Na mesma van solicitar a los xestores del Conceyu qu'adopten l'usu del asturianu con normalidá, dempués de qu'Iniciativa pol Asturianu denunciara que-y prohibieron presentar un documentu nesta llingua nel Rexistru de la institución. IX va solicitar nel plenu que'l Conceyu d'Uviéu se comprometa a tramitar escritos n'asturianu y que se forme a los funcionarios nel usu del idioma. Dende Iniciativa pol Asturianu valoramos de forma positiva esta solicitú y animamos a toles fuercies polítiques del conceyu a sumase a estes propuestes pa dar pasos alantre nel usu del asturianu n'Uviéu.

 

Iniciativa pol Asturianu denunció'l casu que vivió'l vocal de volutariáu de la organización, Xurde García Cilleros, cuando al dir al Rexistru del Conceyu d'Uviéu pa solicitar un espaciu na cai con un documentu redactáu n'asturianu, el funcionariu que lu atendía-y negó la posibilidá d'entregalu n'asturianu y obligólu a preparar el documentu en castellán. Un fechu llamentable y que va contra la llexislación actual.

 

Pal voceru d'IX n'Uviéu, que presenta la moción pa tratar de solucionar esti casu, Roberto Sánchez Ramos, Rivi, "yá ye hora de que'l nuesu Conceyu entienda l'usu del asturianu como daqué normal", recordando qu'"hai munchos ciudadanos que quieren usar l'asturianu pa dirixise a la so institución más cercana y nun se-yos almiten los escritos". Pa Rivi, les midíes que proponen "democraticaréin la vida municipal y garantizaríen un drechu nun Conceyu que ye, amás, la capital del Principáu, y por eso tien tovía más obligación si cabe de respetar, protexer y promocionar l'asturianu". 

 

 Iniciativa pol Asturianu denuncia que l'Ayuntamientu d'Uviéu nun permitió presentar documentos n'asturianu nel so Rexistru