El miércoles 11 de febreru de 2015 los alumnos del cursu d’asturianu impartíu por Iniciativa pol Asturianu nel so llar en Xixón pudieron esfrutar d’una clas maxistral impartida pol filólogu de Clásiques y maestru de llingua asturiana Alfonso Martín Caso.
Nesta clas, ente otres coses, falóse de la hestoria del asturianu al traviés de documentos medievales asturianos, a fin d’echar una güeyada al pasáu del idioma y les cuestiones más llamatives de la escritura de la época, fuertemente llatinizante. Falóse tamién de les variantes xeográfiques y les isogloses que les dividen, que yá fueren demarcaes por Menéndez Pidal va un sieglu. Y nun faltó un repasín a la hestoria de la lliteratura asturiana, destacando la so continuidá a lo llargo la hestoria hasta l’esporpolle que supón el Surdimientu na segunda metá del pasáu sieglu.
