En segundu llugar queda ‘Ritu’ de Pelayo Martínez Olay y en tercer posición, ‘Iḷḷe’ d’Alma Hidalgo Lucena
Iniciativa pol Asturianu va sacar un llibru que recueya toles obres presentaes al concursu
La obra ‘Canes’ ye la ganadora del concursu lliterariu Ensin muyeres, nun hai idiomes, entamáu por Iniciativa pol Asturianu con motivu de la celebración del Día internacional de la Muyer. El xuráu escoyó’l testu de Kai C. Torel como’l meyor de los presentaos nesta primer edición del concursu. El segundu premiu correspondióse cola obra ‘Ritu’, de Pelayo Martínez Olay, y el terceru a ‘Iḷḷe’, d’Alma Hidalgo Lucena.
Esta convocatoria trató de llograr una reflexón sobre la importante figura de la muyer como pegoyu onde deprendimos la nuesa llingua materna, fixándonos especialmente nesi idioma nel que viven, sienten y nos críen les muyeres que nos arrodien faciéndolo al traviés de la lliteratura.
El xuráu d’esta primer edición del concursu lliterariu Ensin muyeres, nun hai idiomes entamáu por Iniciativa pol Asturianu tuvo compuestu por: María Xosé Rodríguez, responsable de la Oficina de Normalización Llingüística de Xixón; Claudia Elena Menéndez Fernández, Directora de la revista lliteraria ‘Formientu’; Marta Mori, vicepresidenta de l’Academia de la Llingua Asturiana; Yosune Álvarez, coordinadora de XEGA; Aridane Cuevas, presidenta de Mil Voces Violetas y del Conseyu de la Mocedá de Xixón; y Jennifer Berrocal Expósito, en representación d’Iniciativa pol Asturianu; y Sonia Uría, faciendo esta última de secretaria del xuráu.
Iniciativa pol Asturianu va sacar un llibru que recueya toles obres y aprovechar l’actu d’entrega de premios como presentación de toles obres presentaes, asinamesmo, la organización quier agradecer toles participaciones a esti concursu que foi un homenaxe a toles muyeres que nos arrodien y a les que gracies a elles deprendimos asturianu.
