Iniciativa pol Asturianu celebró esti sábadu en Xixón el so V Congresu baxo’l lema ‘Ampliando’l consensu poles nueses llingües’ nel cual se renovó la Xunta Directiva de la entidá y elixóse a l’activista y historiadora Arantza Margolles como presidenta de l’asociación. Margolles encabeza una llista renovada, paritaria y con nuevos perfiles pa esti muérganu pa los prósimos trés años. Nel organigrama, la filóloga Claudia Elena Menéndez repite como vicepresidenta, sumándose Vero Suari, esperta en Turismu, como secretaria de la entidá y Felícites Fernández asumiendo les responsabilidaes de l’ayalguería.
El restu de les vocalíes tan ocupaes por nuevos perfiles como Marta Mori, profesora y escritora, como Vocal d’Enseñu; Fernando Padilla, ex Director Xeneral de Política Llingüística, como vocal de Polítiques Llingüístiques y Darío de Dios, profesor y miembru de l’Asociación de Docentes d’Asturianu y d’Eonaviego, como responsable de Formación de la entidá de reivindicación llingüística. Nes nueves incorporaciones figuren tamién l’activista y filóloga Sonia Uría como nueva vocal de Mocedá, l’historiador Raúl Alonso asumiendo les tarees de Comunicación apaeciendo nueves designaciones como l’empresariu Inaciu Iglesias y Marcos Antuña que van ser vocales d’Empresariau y Consumu y de Participación y Movilización respectivamente.
La organización va cuntar con nueves vocalíes de cara a les necesidaes que presenta’l patrimoniu llingüísticu. Oscar David Colorado Ospina, colombianu de nacimientu y xixonés de residencia, va asumir la vocalía d’Estratexa pa Neofalantes pa tratar d’implementar campañes y propuestes dende l’asociación pa tratar de llograr atraer nuevos perfiles implicaos pal asturianu; especialmente de xente que vien d’otros territorios. Aida Iriarte va trabayar na vocalía d’Intelixencia Artificial y Nueves Tecnoloxíes, un ámbitu importante pa la presencia de les nueses llingües.
Pela so parte, van repetir nel cargu la escritora Blanca Fernández Quintana como vocal de Cultura; Pilar Riesco, directiva del Centru Asturianu de Madrid como vocal d’Asturies Esterior; Xosé Álvarez como representante de Rellaciones Internacionales. Víctor Manuel Fernández como vocal delegáu de la entidá en Madrid. El técnicu audiovisual Lluis Fanjul va responsabilizase les xeres d’Imaxe y Diseñu.
L’académicu y ex presidente Inaciu Galán y l’activista feminista Jennifer Berrocal van ser vocales de la nueva Xunta Directiva ensin responsabilidá dala.
Dientro del V Congresu, les y los compromisarios asistentes aprobaron l’Informe de Xestión presentáu pol presidente saliente Iván Llera y analizaron la situación política relativa a la política llingüística asina como estratexes pa llevar alantre nesti ámbitu.
