Iniciativa pol Asturianu y l’Asociación de Docentes d’Asturianu y Eonaviego/Gallego-asturiano (ADAE) denuncien públicamente un actu de discriminación llingüística asocedíu mientres el procesu d’inscripción d’esta asociación de nueva creación. La presentación en Facienda de los estatutos redactaos n’asturianu y eonaviego tuvo una rempuesta negativa per parte de l’alministrativa encargada de tramitar la so inscripción y de proporcionar un CIF provisional.
Esta persona púnxose en contactu cola presidenta de l’asociación per teléfonu, mediu al traviés del que se dirixó a ella de mui males formes dende l’escomienzu de la comunicación. Nesa conversación, pidió-y a la presidenta que mandare en castellán los estatutos. Tres el pidimientu de la presidenta de que-y unviare’l requerimientu per escrito, la trabayadora de l’alministración respondió-y: “claro, para que me saquéis en prensa”. Tres esti comentariu, la muyer siguió faciendo valoraciones negatives sobre los procesos de normalización del asturianu n’Asturies y el gallegu en Galicia con comentarios talos como: “No me parece bien lo que estáis haciendo con el asturiano” o “el gallego que se enseña en Galicia no es el verdadero”. Amás, el tonu y les recriminaciones siguieron subiendo hasta xenerar un ambiente muy desagradable na conversación.
La negativa de l’alministrativa a proporcionar el requerimientu per escritu supón un estorbu burocráticu innecesariu y un claru actu de discriminación que pretendía encubrir nun dexando constancia oficialmente de la so petición. Los comentarios sobre los distintos idiomes nun son otro qu’acciones qu’ataquen los drechos de los falantes d’asturianu. Amás, contravienen la Constitución y l’Estatutu d’Autonomía d’Asturies, que promueven l’usu y la protección de les llingües propies.
Iniciativa pol Asturianu y ADAE consideren inadmisible que nel sieglu XXI entá se sigan dando esti tipu d’actitúes qu’atenten contra la diversidá llingüística. Además, pela si parte, Iniciativa pol Asturianu reclama que se tomen midíes pa esclariar les irregularidaes y que les autoridaes competentes tomen les midíes necesaries pa garantizar el respetu y la igualdá de tratu a toles llingües d’Asturies.
