Mui bonos díes:
Munches gracies pola vuesa presencia a toles autoridaes y gracies a toles persones que güei tais equí pa celebrar esti quintu Día de la Llingua Asturiana na FIDMA. Un día nel qu’arrancamos tamién les celebraciones polos 15 años de la fundación d’Iniciativa pol Asturianu. Ye esta la razón pola que la organización saca a esti vieyu presidente y polo que me pidieron que güei qu’intervenga como fundador d’esta organización. Magar la responsabilidá que supón, toi peragradecíu a la presidenta, Arantxa Margolles, y a tola directiva por ufrime esti honor y poder dirixir unes pallabres nesti día, especial pa nós, porque foi y ye, la Feria Muestres, unu de los finxos especiales d’acción de la entidá dende va yá munchos años.
Un día como güei, bien cercanu a estes feches d’hai quince años, xuntábamonos dempués d’un intercambiu d’artículos en prensa y de delles conversaciones, otru militante d’esta causa, Vítor Suárez, y yo mesmu, pa poner en marcha el proyeutu d’Iniciativa pol Asturianu, al que bien llueu fueron sumándose munchísimes persones axutando les sos voluntaes. Dalgunes falten yá güei y recordámosles con ciñu.
Xuntábemonos porque naquel momentu, hai quince años, la situación del asturianu yera muncho peor de que la que tenemos güei, pero sobre manera porque teníemos un movimientu de reivindicación llingüística qu’escosare les sos estratexes, que navegaba en munchos casos, con muncha con voluntá y trabayu, pero al debalu, frutu d’una cierta frustación, normal tres munchos años de llabor. Facía camudar les coses, dar enfoques nuevos, presentanos a la sociedá d’otra manera, más amable, más abierta. Nesi momentu fuimos conscientes d’esa necesidá de cambiu. Yéremos mozos, cosa que güei ta más en dulda. Había tamién una cuestión xeneracional. Esistía un saltu y un cambiu xeneracional nel movimientu de reivindicación llingüística, que coincidía con cambios políticos y sociales evidentes. Tamos falando de los movíos años 2011 y 2012 nos qu’esistía un cambiu tecnolóxicu, social… Munchos cambios que precisaben tenese en cuenta.
La sociedá asturiana d’entós yera mui diferente a la d’unes décades enantes y había que dirixe a ella acordies con esa realidá. Teníemos de ser más tresversales. El movimientu de reivindicación llingüística nun tenía qu’entender d’ideoloxíes, dientro de los marcos democráticos, constitucionales y de defensa de los derechos humanos. Y ye qu’esti ye un movimientu que reivindica derechos, que reivindica dignidá y llibetá pa los falantes d’una llingua qu’a lo llargo de sieglos tuvo marxinada y reprimida, y que pa camudar de situación precisa reivindicase, pero precisa tamién ganar complicidaes, non convertise nuna comunidá zarrase en si mesma ente los más convencíos y puristes.
Eso tuvímoslo bien claro dende’l primer momentu: habíemos sumar a más persones, habíemos sumar a xente de distintos ámbitos ideolóxicos y de distintos espacios de la sociedá asturiana. Nun podíamos siguir xuntándonos nos círculos de persones yá convencíes, de persones yá falantes; precisábamos xunir a esti trabayu y a esta llucha a xente con matices distintos, con formes diferentes de ver la cuestión llingüística asturiana. Buscar los mínimos cómunes que multiplicaren la nuesa capacidá d’acción.
Y fixímoslo con aquel lema col qu’arrancábemos Iniciativa pol Asturianu: «El futuru del asturianu depende de ti, toma la iniciativa». Movimos a la sociedá, trabayemos dende distintos ámbitos y contaxemos al movimientu de reivindicación llingüística pa facelu más diversu, más plural, con una mayor capacidá d’introducir los nuesos discursos nel ámbitu políticu y social.
Güei, quince años más tarde, gracies a Iniciativa pol Asturianu, pero non namás por ella, el movimientu ye meyor y más útil pa la sociedá asturiana y pal futuru del idioma gracies a esi trabayu que se fixo. Anguaño esisten otros colectivos colos que collaboramos nel ámbitu de la empresa, de la tresmisión interxeneracional del idioma, del audiovisual, del periodismu, del profesoráu o de la lliteratura. Porque teníemos, y siguimos teniendo claro que la cuestión nun ye patrimonializar la reivindicación, sinón collaborar pa qu’esta seya más grande, y facémoslo cada día trabayando con estos colectivos sectoriales.
El movimientu de reivindicación llingüística d’Asturies ye güei más fuerte, más diversu, más xenerosu y consiguió numberosos llogros nestos quince años gracies a estes estratexes nueves.
Una de les cuestiones que más frenaba al nuesu paecer al movimientu yera centrase namás y xugar toles cartes a la solución de la oficialidá. Quince años más tarde, y tres cambiar esa estratexa, tamos muncho más cerca de la oficialidá, pero ensin escaecer pel camín dar otros pasos. Porque cada mínimu pasu alantre ye una celebración, ye un camín que percorremos a favor de la oficialidá y, poro, del futuru del asturianu. Celebrar los pasos, tener una visión amable y optimista, ser quien a reconocer al que fai coses pol idioma, anque nun faiga toles que pueda o les que tendría que facer, ye tamién una manera de danos puxu y poder siguir trabayando. Les visiones derrotistes y murnies lleven namás a la parálisis.
Hai quince años, la oficialidá y la defensa de la llingua asturiana yera minoritaria nel parllamentu asturianu. Agora, nesta llexislatura, votóse la oficialidá y llogróse una mayoría absoluta amplia, que nun se pudo llevar alantre por unos pocos diputaos, por esos trés quintos necesarios. Asina que tenemos que siguir trabayando, pero facémoslo con gran optimismu. Fai falta sumar más.
Celebramos quince años d’Iniciativa pol Asturianu, y veis que lo facemos con arguyu y reivindicándonos, pero nun nacimos de la nada, y esti añu celebramos tamién cincuenta aniversariu del nacimientu de Conceyu Bable. Falaba apocayá nun congresu internacional que celebremos n’Uviéu —onde vinieron persones qu’en dalgunos casos llevaben más de 40 años ensin pisar Asturies— y facíalos de les meyores que se llograron pal idioma nestos años. D’hai 50 años pa equí, la llingua asturiana dio pasos importantísimos na escuela, nos medios de comunicación, na visibilidá pública y na autoestima de los asturianos y asturianes. Nun podemos escaecer los llogros de tantes persones trabayando.
Y siguimos trabayando porque entá queda muncho por facer, pero el camín andáu ye bien positivu y tenemos de tar arguyosos como sociedá. La llingua asturiana sigue teniendo problemes y sigue tando en peligru, pero güei esisten unes estructures sociales y polítiques que garanticen que siguamos trabayando pa da-y futuru.
Va cincuenta años y hai quince años les coses yeren bien distintes: teníamos a líderes políticos con discursos bien negativos sobre’l futuru del asturianu y sobre la oficialidá. Güei estos discursos camudaron radicalmente y son positivos. Güei cada vegada más empreses usen l’asturianu, cada vegada úsase más nes instituciones, y anque hai peligros nel horizonte —como los discursos de la estrema derecha, que trabayen siempres contra los derechos humanos (y nun escaezamos de que cuando falamos del usu d’una llingua y del so respetu tamos falando de derechos humanos)—, esos peligros tán ende y tenemos de combatilos. Toi seguru de que la sociedá asturiana sabrá siguir faciéndolo, y nós, dende Iniciativa pol Asturianu, vamos siguir esbrexando y trabayaremos otros quince años y tolos que vengan alantre, porque inclusive cola oficialidá les nueses llingües siempres van precisar que trabayemos pa da-yos futuru.
Tuvimos la mala suerte de nacer siendo falantes, o incoporanos, ¡qué importantes los neofalantes!, d’una llingua cola so hestoria y les sos problemátiques, pero tenemos la suerte güei de cuntar con munches más ferramientes pa da-y futuru. Asina que toi bien feliz de poder falar nesti quintu Día de la Llingua Asturiana, nesta Feria de Muestres, a la que güei-y volvemos pidir un mayor usu del asturianu, como lo tán faciendo les empreses y les instituciones presentes nella. Por eso pidimos a la Cámara de Comerciu de Xixón y animámoslos a que lo faigan siendo exemplu: que’l cartelu cada añu seya billingüe, qu’usen la toponimia asturiana y a que na feria tamién podamos sentilos falar asturianu, como güei fixo per primer vegada’l director de la FIDMA. Norabona pol pasu. Sé que collaborando vamos llogralo. Hai ocho o nueve años paecíanos imposible simplemente tar equí nesta feria col nuesu espaciu; hai un poco más de cinco años, que se dedicara un Día de la Llingua Asturiana na feria paecía más que difícil. Lo pasos qu’agora paecen imposibles van ser realidá si los trabayamos. Vamos tar ende pa sofitar, p’asesorar, como lo tamos coles empreses y coles instituciones acaldía.
Nestos anos centos de militantes da nosa organización trabayaron muito pol asturiano y pol eonaviego. A nosa acción chegóu a todos os puntos d’Asturias y dos territorios unde se fala asturiano, pero tamén al ámbito internacional, collaborando con otra organizacióis del estao y d’otros países, levamos a situación dos idiomas d’Asturies a ONU, a Unión Europea ou al Conseyo d’Europa, pero tamén a muitos espacios da sociedá asuriana. A militancia d’Iniciativa pol Asturiano merez tamén hoi un reconocemento.
Nun escaezáis, representantes de les instituciones que tais güei equí. Sabemos que somos incómodois munches vegaes. Tócanos tar enriba de vós y emburriar, porque ye’l nuesu llabor y el nuesu trabayu. Realmente precisáis tamién escuchanos y vamos siguir diciendo lo que falta, reclamando, espero que con capacidá de facelo de forma razonable y razonaba, pero tamién tamos siempres ehí pa dar la mano y trabayar cuando se nos pide, como lo fixímos en tantes situaciones: Ayudando a redactar planes de normalización, trabayando y asesorando a les persones que lo pidieron en cada llugar nel que fixo falta, pa ver qué se pue faer pola idioma en cada sitiu, pa llograr pasos alantre. Precisamos un mayor compromisu. Pidímosvoslo siempres, como lo venimos pidiendo dende hai quince años: Trabayái, por favor, acaldía, pa que la llingua asturiana tenga futuru.
Quince años depués volvémos a dicir a la ciudadanía, a los y les representantes públicos y persones que nos acompañáis, a toos y a toes: El futuru del asturianu depende de ti.
Munches gracies.
