Iniciativa pol Asturianu abrió esti sábadu les puertes del so espaciu na Feria Internacional de Muestres d’Asturies (FIDMA), onde esti añu celebra, a mou d’una gran fiesta d’aniversariu, los quince años de nacencia de la organización.
Iniciativa estrena amás un espaciu nuevu más ampliu y lluminosu, con salida propia a la cai dende’l pabellón 3-4, frente al Pabellón Central. Una forma de siguir medrando na visibilidá de la cuestión llingüística y la oficialidá. L’espaciu tien un diseñu nuevu con un espaciu fabricáu por Cartón VIR cola collaboración de la diseñadora Cristina González.
L’actu inaugural contó cola participación del fundador y primer presidente de la entidá, Inaciu Galán, y del vocal de Voluntariáu de la Xunta Directiva, Marcos Antuña, que protagonizaron de manera simbólica’l tradicional corte de cinta. Esti espaciu va acoyer, amás, el próximu 15 d’agostu, la quinta edición del Día de la Llingua Asturiana na FIDMA.
Con esta yá son ocho les ediciones nes qu’Iniciativa pol Asturianu ta presente na principal feria comercial d’Asturies, consolídase asina un espaciu que nació cola voluntá de dar visibilidá al idioma nel ámbitu económicu y empresarial y de demostrar que l’asturianu ye una ferramienta útil, moderna y con futuru.
Dende 2017, la llingua asturiana cuenta con un espaciu propiu dientro de la FIDMA, que se convirtió nun escaparate de referencia pa les empreses y profesionales qu’apuesten pol usu del idioma na so actividá diaria. Tres ocho años de presencia continuada, esti stand consolidóse como un puntu d’alcuentru pa la reivindicación llingüística y como un reconocimientu al texíu empresarial comprometíu cola llingua asturiana.
Nesta edición participen quince empreses y marques pertenecientes a ámbitos tan diversos como la moda, la industria, l’agroalimentación, la edición, l’audiovisual, l’artesanía, la traducción o les nueves tecnoloxíes: Al Otru Andar, Básico Estudio, Cartonaxes VIR, Cerveza Caleya, Cooperativa Astuenerxía, Cuatro Gotes Producciones, Ediciones Radagast, Editorial Pintar Pintar, Editorial Trabe, La Fabriquina Creaciones Culturales, La Semeya Editorial, Nordés Móvil, Panduru Repostería Circular y Puru Remangu.
Al traviés d’esti espaciu, Iniciativa pol Asturianu quier treslladar a los miles de visitantes de la Feria de Muestres que l’asturianu nun ye namái patrimoniu cultural, sinón tamién un activu económicu que favorez la creación d’empreses, xenera actividá económica, crea puestos de trabayu y aporta valor a los productos y servicios. La variedá de sectores representaos demuestra que la llingua pue convertise nun elementu de diferenciación y d’identidá empresarial.
Nel actu d’apertura, Inaciu Galán señaló que «ye un momentu pa poner en valor los pasos alantre que ta dando l’asturianu na sociedá asturiana y comprobar que cada día son más los profesionales y les empreses que lu empleguen con total normalidá na so actividá comercial. Sicasí, tamién acabamos de comprobar na propia Feria que munchos organismos públicos, incluyíos espacios pertenecientes a conseyeríes del Gobiernu d’Asturies, como la de Vivienda, siguen incumpliendo les directrices vixentes en materia de normalización llingüística».
Galán destacó igualmente los avances producíos nos últimos años na presencia pública del idioma, poniendo como exemplos la incorporación del asturianu nel Puertu de Xixón o na Universidá d’Uviéu.
Pela so parte, el vocal de Voluntariáu, Marcos Antuña, afirmó que «esti aniversariu tien que sirvir pa recargar fuercies y siguir reivindicando los derechos llingüísticos de la ciudadanía, ensin dar nengún pasu atrás y apostando siempre pol consensu, el diálogu y l’alcuentru».
Iniciativa pol Asturianu, que nun recibe nengún tipu d’ayuda pública pa esta iniciativa, quier que’l so espaciu seya un llugar d’alcuentru abiertu a tola ciudadanía y un escaparate que visibilice la importancia del asturianu como motor de creatividá, innovación y desarrollu económicu. El stand puede visitase nel pabellón 3-4 del Palaciu de Congresos de la FIDMA.
