Dende’l nacimientu d’Iniciativa pol Asturianu tenémoslo mui claro, la presencia de la organización nes cais ye imprescindible nel trabayu a favor del idioma. Los asturianos viven tovía con munchu desconocimientu la situación llingüística del país. Les aliministraciones encargáronse con muncha eficacia de torga-yos l’accesu a la información sobre la so llingua, sobre la situación que vive y sobre les soluciones. Y en munchos casos encargóse d’introducir prexuicios y falses idees na sociedá.
Una sociedá informada sedrá consciente de la necesidá de da-y soluciones al asturianu pa que siga teniendo futuru. Dende’l movimientu de reivindicación llingüística tenemos de facer una reivindicación activa, nun podemos esperar simplemente a que la xente “espierte”, sinón que tenemos que salir a la cai.
Nós vémoslo cada día, cuando salimos colos puestos del Voluntariáu d’Iniciativa pol Asturianu, cuando damos charres, cuando celebramos cursos d’asturianu, o cuando facemos actos na cai… la xente recibe mui bien a la so llingua cuando se-y presenten les coses con claridá, cuando s’informa y s’anima a la xente, y munchos acaben por sumase al llabor.
Por eso ye tan importe da-y puxu a esta presencia na cai. Nun podemos tar esperando a que la xente se sume a esti llabor, que ye de toos y toes, ensin más. Tenemos de dir a facer trabayu d’espardimientu de la información, tenemos que convencer a la sociedá asturiana non solo de lo importante que ye caltener la nuesa llingua, sinón de qu’ensin ellos ye imposible facelo. Y esi trabayu hai que facelu persona a persona, saliendo a buscalos ellí onde tean.
Nesi camín vamos trabayar faciendo medrar la nuesa presencia nes cais cada vegada más, pa lo que vos animamos a sumavos a los nuesos equipos de Voluntariáu. Necesitamos una sociedá que protagonice la recuperación del idioma de la forma más activa posible, necesitamos una sociedá convencida de que paga la pena lluchar pol futuru del asturianu.