Iniciativa pol Asturianu, como asociación que trabaya pola defensa y promoción de la llingua asturiana, una llingua minoritaria europea, quier amosar el so más fonderu sofitu a la iniciativa entamada por 'Progetu Repùblica' de Cerdeña pa pidir que la rede social Facebook permita l'emplegu del sardu nel so web.
Iniciativa pol Asturianu ye una organización que ñació col enfotu de defender y promover la llingua asturiana, al empar que ta comprometida cola defensa de toles llingües minoritaries del mundu, comprendiendo la importancia de caltener el patrimoniu llingüísticu y cultural que suponen toes elles pa la Humanidá.
Poro, al traviés de la so Xunta Direutiva, Iniciativa pol Asturianu vien de firmar esta demanda y encamienta a quienes tean comprometidos cola llingua asturiana a nun escaecer que'l nuestru compromisu tamién ha ser pa col restu de llingües que, como l'asturianu, requieren d'una defensa dafechu pa garantizar el so futuru.
