Un alumnu asturianu de la Universidá de Cantabria solicitó que'l nome del so llugar de nacencia, un conceyu asturianu, apaeciere na so forma oficial na orla de fin de carrera. El serviciu de protocolu de la universidá cántabra negóse nun primer momentu.
Darréu d'ello, l'alumnu consultó con Iniciativa pol Asturianu y unvió un escritu esplicando la situación llegal d'oficialidá del topónimu en cuestión. Ensiguida la Universidá de Cantabria camudó la so postura inicial y usó la toponimia oficial d'Asturies na orla del alumnu, pidiéndo-y disculpes al alumnu pola postura inicial del departamentu encargáu de les orles.
Esti casu, anque nun pase d'anecdóticu, recuerda la importancia de l'acción ciudadana nel día a día pal espoxigue del asturianu. Ye por ello que dende Iniciativa pol Asturianu aprovechamos pa dalu a conocer y animar a la xente a implicase y a facer valir los sos drechos llingüísticos, pa lo que toles persones que lo precisen puede cuntar col nuesu sofitu.
