Esti vienres 11 de mayu, Día de les Lletres Asturianes, más de 2.000 persones percorrieron la cai Uría d'Uviéu hasta'l Teatru Campoamor con un lema claru "Oficialidá pa la llingua asturiana". Iniciativa pol Asturianu participó como cada añu con pancarta y nesta ocasión con unos reivindicativos xiblatos, pa meter ruiu pol oficialidá.
Iniciativa pol Asturianu celebra qu'un añu más la sociedá s’implicara y ficiera oyer la so voz, que ye mayoritariamente favoratible a que l’asturianu se convierta nuna llingua normal, que pueda usase en tolos ámbitos y que tenga garantizáu’l so futuru, lo que solo ye posible si esta ye declarada llingua oficial.
Anque la organización recuerda que la oficialidá nun ye una varina máxica que vaiga solucionar tolos problemes del idioma d’una vegada, sí ye imprescindible pa que’l procesu de recuperación del asturianu pueda llevase alantre.
A lo llargo de la Manifestación pola Oficialidá tuvo tamién presente un equipu del proyectu televisivu "Alderiques d'Asturies" que la organización tien a comuña con Infoasturies.net y ConocerAsturias, qu'ufrirá nos próximos díes un reportaxe sobre la xornada reivindicativa.
