Dende’l ñacimientu d’Iniciativa pol Asturianu venimos repitiendo la importancia de que toos y caún de los asturianos y les asturianes tomen la inciativa. Nun podemos esperar que naide venga a solucionar los problemes del asturianu, anque tenemos de siguir reclamando a les alministraciones que lo faigan. Inclusive con unos gobiernos que ficieren tolo posible pola llingua asturiana, l’acción de la sociedá civil diba siguir siendo imprescindible, el compromisu llingüísticu d’una sociedá ye la más importante ferramienta de normalización que podemos tener.

 

Ye por ello que celebramos el ñacimientu d’organizaciones sectoriales como Reciella, families pol asturianu, que ñaz de la necesidá de munchos padres de buscar ferramientes afechisques pa facilitar la tresmisión del asturianu a los sos fíos, nun contestu nel que nun ye fácil, pola progresiva castellanización social, y pola falta d’un sistema educativu y unos medios de comunicación qu’ayuden a correxir esta situación.

 

Nesti momentu, nun queda otra que metese en fariña y trabayar nel nuesu ámbitu más cercanu. Les families pol asturianu son un exemplu d’ello, como munches persones que nel so día a día, lleven l’asturianu a la so empresa, asociación o grupu d’amigos. Pasu ente pasu y cada día, tenemos que siguir trabayando pa que más persones tomen la inciativa pol asturianu. Presta ver que cuando se faen les coses bien, la respuesta de la sociedá ye bona, y l’asturianu resulta un atractivu sentíu como propiu por toos.

Artículos venceyaosMás del autor