Iniciativa pol Asturianu va participar na concentración d’esti xueves 25 contra la prohibición del asturianu na Xunta Xeneral

Espublizao 24/02/16

La concentración, convocada pola Xunta pola Defensa de la Llingua Asturiana reclama dignidá pa la llingua asturiana dempués del ataque nel parllamentu

Iniciativa pol Asturianu quier declarar el so sofitu a la concentración convocada pola Xunta pola Defensa de la Llingua Asturiana pa esti xueves 25 a les 17 hores a les puertes de la Xunta Xeneral d’Asturies, n’Uviéu.

La organización va participar de la concentración animando a tolos sos socios y a tola sociedá asturiana a sumase a esti actu reivindicativu que vien a amosar el descontentu ciudadanu coles declaraciones contra l’asturianu de Mercerdes Fernández, presidenta del PP d’Asturies, asina como cola decisión apoyada pola FSA-PSOE, Foro y C’s, pa prohibir l’usu del asturianu nel parllamentu.

La concentración ye una amuesa más del descontentu social que xeneró esta decisión y que sumó yá cuasi 3.000 firmes contraries na convocatoria abierta contra ella por Iniciativa pol Asturianu va una selmana en Change.org, amás d’una montonera de crítiques nes redes sociales y n’especial nel tuit de Mercedes Fernández (@cherines_pp) nel que celebraba la consecución de la prohibición. 

Videu destacáu

Protocolu Garantía de los Drechos Llingüísticos

El Protocolu pa la Garantía de los Drechos Llingüísticos ye un documentu internacional que quier ser una continuación de la Declaración Universal de los Drechos Llingüísticos aprobada va agora venti años.