Un puestu informativu d'Iniciativa pol Asturianu con materiales a la venta y voluntariáu de la organización, va tar dientro del ciclu de música organizáu por Ixuxú Asturies-Euskal Herria elkartea. El conciertu celébrase esti sábadu'l 31 de xineru na Sala Whippoorwill, colos grupos Skakeitan y Skama la Rede.
Música en movimientu, pueblos moviéndose. El llema ye’l reflexu de Glayíos/Oihuak, una iniciativa asociativa xuvenil pa sofitar a bandes asturianes y vasques lloñe de la so tierra. Acullá de la música, ye un proyectu que-y da puxu a un modelu nuevu de xestión cultural basáu na cooperación, l’autoxestión y la tresmisión de principios. Esti sábadu 31 ye la primera puesta n’escena.
Iniciativa pol Asturianu quier aprovechar esta ocasión pa dar a conocer la situación de la llingua asturiana ente los siguidores d'estos grupos, asina como sofitar una iniciativa onde la música en llingua asturiana, xunto a la vasca, son protagonistes.
== El conciertu ==
A les diez de la nueche va entamar la descarga de ska, folk asturiano y punk-rock con Skama la Rede. N’activo dende’l 2003, esti grupu d’El Cabu Peñes y Villaviciosa ye ún de los nomes más destacaos de la escena de rock n’asturianu. El pasáu mes de xunetu publicaron el so cuartu discu ‘Avante’, un trabayu d’altor dientro de la so trayectoria ascendente y imparable gracies al so directu enérxicu y al so estilu inconfundible.
Los anfitriones van dar pasu a Skakeitan. Con cerca de 70 conciertos en dos años namás -ente los que s’inclúin tocar con Manu Chao énte 60.000 persones- estos donostiarres yá son muncho más que la promesa moza del ska-rock vascu. Vitalidá, frescura y munchu puxu nestos herederos de clásicos del rock combativu y de la música xamaicano (Mano Negra, Rancid, Skalariak, Jimmy Cliff…). ‘Orekariak’ ye’l so segundu discu y ésta va ser la so primer puesta n’escena lloñe d’Euskal Herria.
