La organización denuncia lo que considera una discriminación que va contra la Ordenanza sobre l’usu del asturianu, vixente dende 2002
El Conceyu Villaviciosa convocó yá va unes selmanes el I Premio de Relatos de Villaviciosa, concursu lliterariu dotáu con 1.000 euros y una mazana de plata pal ganador. Sicasí, según les bases reguladores, namás pueden presentase rellatos escritos en castellán. Lo cual supón una discriminación grave pa la llingua asturiana, asina como pa tolos escritores que la empleguen nes sos creaciones.
La Ordenanza Municiapl sobre l’Usu del Asturianu del propiu Conceyu, que data del añu 2002, fai pública reconocencia de la importancia de promocinar la llingua propia y favorecer el so usu en cualesquier estaya. Asina, dende Iniciativa pol Asturianu nun entendemos esti arrequexamientu del asturianu nel tarrén lliterariu, polo que pidimos una modificación na convocatoria del concursu pa que puean presentase testos nos dos idiomes.
La organización fixo llegar yá la quexa de forma oficial al Alcalde y a toles fuercies polítiques presentes nel plenu del Conceyu, y espera una respuesta positiva que camude esta situación nes próximes convocatories del premiu. Entendemos que la meyor forma posible ye conviertiendo’l premiu nun concursu pa obres n’asturianu, o abriendo una categoría distinta pa obres na llingua propia de Villaviciosa y d’Asturies, l’asturianu.
Dende Iniciativa pol Asturianu recordamos que les alministraciones públiques tienen la obigación de protexer y promocionar el patrimoniu cultural y llingüísticu que mos dexaron persones como Xosé Caveda y Nava, ilustre políticu y escritor nacíu en Villaviciosa, que foi’l responsable, ente otros llogros, d’asoleyar el primer llibru impresu con testos n’asturianu, amás de ser autor él mesmu n’asturianu.
Esta ye una midida de costu cero, yá que nun sunpondría añadir un mayor presupuestu al yá aplicáu. Amás, daría un importante prestixu a les obres lliteraries n’asturianu y favorecería la creación. Iniciativa pola Asturianu pide tanto al equipu de gobiernu como a les fuercies presentes nel plenu qu'impulsen esta reforma, col fin de sofitar el procesu de normalización social del idioma, acabando asina con situaciones de marxinación como la que se ta dando nesta primer edición del premiu.
