UVIÉU, 26/04/2012. Iniciativa pol Asturianu considera que la decisión de l’Asociación d’Escritores d’Asturies de nun contemplar les obres en llingua asturiana pa la edición de los Premios de la Crítica 2012 ye una falta seria al idioma d’Asturies. La organización púnxose en contautu col presidente de l’asociación convocante, Mariano Arias Páramo, pa face-y llegar la so opinión sobre esta decisión, amás de cola Conseyería de Cultura, que sovenciona estos premios, pa pidi-yos que soliciten a la organización la vuelta a la normalidá de la lliteratura n’asturianu nestos premios, que nun tienen dotación económica.
Dende Iniciativa pol Asturianu consideramos inalmisible tala decisión por ser un xestu dañible pa la llingua nuna situación tan drástica como na qu’anguaño s’atopa. Poro, pidimos l’Asociación d’Escritores d’Asturies que rectifiquen esta decisión, calteniendo toles categoríes contemplaes nel pasáu, en pie d’igualdá colos escritores en castellán.
Per otru llau, Iniciativa pol Asturianu quier reconocer que, hasta la cabera edición de 2011, esta asociación taba diendo pel bon camín al incluyir, dende la so cuarta convocatoria (2003) a la lliteratura asturiana dientro de los Premios de la Crítica, al mesmu tiempu qu’ufríen y siguen ufriendo los servicios del so web n’asturianu, y ye por esta razón qu’esperamos qu’esta murnia decisión nun seya sinón un casu aislláu que pueda contar cola más rápida rectificación.
A lo cabero, dende Iniciativa pol Asturianu queremos aprovechar pa ufrir la nuestra collaboración no que mos seya posible pa facilitar la vuelta de la llingua asturiana al llugar que-y correspuende dientro d’estos reconocimientos otorgaos pola Asociación d’Escritores.
