Iniciativa pol Asturianu asoleya la “Cerveza pol asturianu”, la cerveza que-y presta a la to llingua

Espublizao 20/02/17

Esti martes 21, Día Internacional de la llingua materna, la organización Iniciativa pol Asturianu presenta la “Cerveza pol Asturianu” col lema “La cerveza que-y presta a la to llingua”. Amás de les campañes nes redes sociales pa esti día, la entidá quier amosar el valir de la llingua de los asturianos como daqué positivo, actual y qu’amás puede xenerar una imaxe de marca propio en too tipo de proyeutos.

Iniciativa pol Asturianu, en pallabres del presidente la organización, Inaciu Galán pretende: “Da-y más visibilidá a la reivindicación y llevala a espacios onde nun llegaba y pueda tar de forma tresversal”. Esta idea de fondu ye un vezu nesta organización que, dende’l so entamu, trabaya pola normalización y presencia del idioma en toles estayes de la sociedá civil.

La entidá collaborará cola empresa xixonesa “Bayura Asturies Craft Beer”, fabricadores asturianos de cerveza artesano y nietos de la emblemática cerveza “La estrella de Gijón”. Como dirán na so propia páxina web: “Nacimos pensando en facer cerveces de calidá, alloñandose de los productos mas comerciales, emplegando les meyores materies primes, camentando nel mediu ambiente y nel orixe, d'onde venimos y a onde vamos”. Too una declaración d’intenciones.

La rueda de prensa tendrá llugar esti martes 21 a les 17:30 nel Conseyu de Mocedá de Xixón (Avenida Manuel Llaneza, 68) cola presencia del director de Bayura, Serxu Solares y el presidente d’Iniciativa pol Asturianu, Inaciu Galán.

Videu destacáu

Protocolu Garantía de los Drechos Llingüísticos

El Protocolu pa la Garantía de los Drechos Llingüísticos ye un documentu internacional que quier ser una continuación de la Declaración Universal de los Drechos Llingüísticos aprobada va agora venti años.