Iniciativa pol Asturianu llamenta no más fondero la noticia sobre la muerte de Felipe Prieto (Zamora, 1941-Uviéu, 2014), escritor n'asturianu con una obra curtia asoleyada pero d'abonda calidá. Prieto yera amás miembru de l'Academia de la Llingua Asturiana dende los sos entamos.
N'Iniciativa pol Asturianu queremos da-y el nuesu pésame a la so familia y aprovechar pa reconocer la importancia de la obra pa la modernización de la lliteratura na nuesa llingua, como parte del movimientu del Surdimientu, yá que yá nos años sesenta escribió les sos primeres obres, onde afondaba en temes non trataos hasta'l momentu na poesía asturiana.
Ver intervención de Xosé B. Álvarez, vocal d'Iniciativa pol Asturianu, nel informativu de TPA
Tea en paz.
Quedámonos colos sos versos como alcordanza.
Dexáronmos equí
pa morrer solos y amanciaos
como mazanes vieyes..,
y los corazones esgonciaos
como en dayuri les portielles.
Dexáronmos equí
per entre les utres y les peñes,
y el cuchu amontonáu
peles caleyes.
Dexáronmos equí pa buscá vida
y daqué pa h.acer coles sos manes,
que la tierra yá se ve
equí na ería
y menos non se verá pente alemanes.
Dexáronmos equí
con una tierra vieya y espurría
que por non dar non da ni herba roína.
Dexáronmos equí
los vieyos, y los coxos, y los ciegos
y hasta los muertos
quedáronse na osera
con los huesos axuntaos nun maniegu.
Denantes había palombes nesti pueblu,
agora nuestres palombes son los cuervos.
Felipe Prieto (Esbilla, 1980)