Dende Iniciativa pol Asturianu denunciamos que‘l nuevu diseñu de la páxina web, magar que tien versión hasta en seis llingües, nun tien al asturianu ente elles.

XIXÓN, 27/09/2019. Güei ye’l Día Internacional del Turismu y el Gobiernu d’Asturies celébralo estrenando nuevu diseñu web de Turismu, tal y como anunciaron nes redes sociales dende esti departamentu.

Dende Iniciativa pol Asturianu denunciamos que‘l nuevu diseñu de la páxina web, magar que tien versión hasta en seis llingües, nun tien al asturianu ente elles.

Pa Iniciativa pol Asturianu tamos énte otra nueva oportunidá perdida d’incluyir al asturianu nel ámbitu de la promoción turística que da mui males señales del camín. Dende la organización entendemos que l’usu del asturianu ha ser tresversal a toles conseyeríes, pero especialmente grave ye qu’un departamentu incluyíu dientro de la Conseyería qu’inclúi l’epígrafe “Política Llingüística”, nun entame a facer polítiques de visibilización y normalización como estes, de costu prácticamente cero, dende’l primer momentu.

Iniciativa pol Asturianu esixe que se corrixa esta situación de forma urxente, añadiendo versión n’asturianu y faciendo un usu completu de la toponimia tradicional oficializada en tolos ámbitos: páxina web, publicidá turística, redes sociales, etc.