Nuevu programa d'Iniciativa pol Asturianu nes ones. Nesta ocasión, Samuel Gradín entrevista a los responsables d'un cursu d'hestoria d'Asturies que se fai en Corvera a lo llargo d'estes selmanes.

"Una pregunta pa cada historia" busca introducir na Hestoria d'Asturies a les persones interesaes, siempres dende un plantegamientu abiertu y rigorosu al empar, col que s'acerquen a custiones como'l Reinu d'Asturies, la cultura na Edá Media Asturianu-Lleonesa, la conformación del territoriu asturianu, les condiciones de vida del campesináu, el papel de la Illesia, los oríxenes del Principáu y la Xunta Xeneral, ente otres más. 

Esti taller va ser impartíu pol téunicu responsable del Serviciu de Normalización Llingüística de Corvera, Rafael Rodríguez Valdés, que ye Llicenciáu n'Hestoria pola Universidá d'Uviéu y Postgráu n'Archivística pola UNED, amás de ser autor de distintes publicaciones venceyaes cola Hestoria d'Asturies y con él falemos nel nuesu programa. 

D'otra banda, va cuntase cola participación de trés hestoriadores especialistes na dómina medieval y moderna, casu de Xuan F. Bas Costales, Jesús Fernández Fernández y Nicolás Alonso Rodríguez, que van ufrir charres temátiques demientres el taller. 

 

Sentir programa completu