Concentración d’entidaes frente al Congresu.
La llei que se va aprobar nun respuende a la demanda ciudadana
nin a la igualdá ente los y les ciudadanes.
La presencia de llingües distintes del castellán será testimonial
Representantes de les principales entidaes que trabayen a favor de les llingües minorizaes gallega (A MESA), vasca (Euskalgintzaren Kontseilua), catalana (Plataforma per la Llengua, Ómnium, ACPV, Escola Valenciana y FOLC) y asturiana (Iniciativa pol Asturianu) concentráronse esta mañana delante del Congresu de los Diputaos enantes del entamu del debate de la llei xeneral audiovisual, porque la norma que se pretende aprobar nun va a dar más que pequeños pasos que nun garanticen la igualdá llingüística.
Una vegada que s’inició la concentración, tomaron la pallabra representantes de diferentes entidaes: Marcos Maceira (A MESA), Paul Bilbao (Kontseilua), Francesc Marco (Plataforma), Elena Jiménez (Òmnium), Ruben Pitchart (ACPV), Maria Nebot (Escola Valenciana), Daniel Condemines (FOLC), eta Iván Llera (Iniciativa pol Asturianu).
En primer llugar, denunciar que se trata d’una llei que nun respuende a la realidá llingüística esistente nel Estáu: «Debemos tener en cuenta qu’esta llei ye una trasposición de la direutiva de la Unión Europea precisamente pa dar cabida a la producción europea. D’esta forma, evitóse la realidá llingüística europea, dando una presencia indigna a les llingües propies del Estáu. Creemos sinceramente que se perdió la oportunidá pa la igualdá y que la llei invisibilizará a les nueses llingües nes pantalles. Ye más, va siguir de manera constante la vulneración de drechos» afirmaren.
Asina, los representantes de les entidaes ficieron referencia al procesu d’ellaboración de la llei: «Los axentes sociales a favor de les llingües mantuvimos una actitú proactiva, faciendo aportaciones concretes nos anteproyeutos, treslladando a los partíos les nueses propuestes, activando a la ciudadanía pa demostrar la esistencia d’una demanda social». A pesar d’ello, nun se recoyeron les nueses peticiones, poro que se puede dicir que la demanda ciudadana foi tenida en cuenta na Llei».
Amás, recordaron varios elementos recoyíos na declaración consensuada xunto con otros axentes (CIEMEN, ACV Tirant lo Blanc y OCB del catalán, y NOGARÁ del aragonés): «Si bien la presión política y social exercida poles entidaes fueron determinantes pa incluyir mínimos pa toles llingües tanto nes cuotes de catálogu de les plataformes y retransmisiones de TVE, como na financiación anticipada, los cambeos introducíos son claramente insuficientes y testimoniales al representar entre el 0,35% y el 2,55% del conxuntu. Ye dicir, les cuotes que s’establecerán col supuestu oxetivu de garantizar la pluralidá llingüística son testimoniales».
Y ye que, tal y como afirmaron les entidaes, la llexislación xeneral audiovisual solo estableció porcentaxes obligatorios de conteníos mínimos y financiación pal castellán, ensin nenguna indicación nin reconocimientu pa otres llingües esistentes nel Estáu español fuera de la retórica vacía de conteníu. Esto impide que neños y neñes, mocedá y el públicu en xeneral disfruten na so llingua de la amplia ufierta disponible de programes de televisión, series y películes. «Desgraciadamente la nueva llei nun supón cambeos significativos nesti sentíu» afirmaron.
P’acabar, los axentes a favor de les llingües minorizaes quieren reiterar el so compromisu de siguir trabayando: «Ye cierto que nesta ocasión nun se cumplieren los oxetivos previstos y que van aprobar una llei qu’invisibiliza la presencia de les nueses llingües. En tou casu, vamos siguir trabayando pa crear les condiciones adecuaes pa vivir nes nueses llingües, asina como pa que les nueses llingües ganen espacios, ente ellos les pantalles» apuntaron.
