El vienres 31 de mayu celebráronse en Cangues d'Onís dellos actos que sirvieron pa presentar Iniciativa pol Asturianu nel conceyu. Pela mañana, dellos alumnos del Institutu Rei Pelayo participaron nuna charra sobre l'asturianu na que se-yos dio a conocer la organización. Yá pela tarde-nueche, nel chigre Filandón, presentóse a los asistentes, qu'enllenaron el llugar, l'actividá de la organización.
Dende Iniciativa pol Asturianu valoramos como mui positiva la respuesta de la xente, faciendo dellos socios y collaboradores nuevos nesti conceyu del oriente d'Asturies, y siendo testigos del interés pol asturianu de munchos cangueses.
Nel actu presentóse tamién la revista lliteraria Formientu y la obra del autor mozu y cangués, Alberto Cla, participando dellos escritores de la revista y otres persones que s'animaron a facer llectura a testos propios y d'otros autores.
Demintres l'actu instalóse un puestu de venta de productos de la organización obteniendo una bona recaldación ya informando a munches persones sobre la nuesa actividá, cursos d'asturianu y la campaña pal usu del asturianu na empresa que ta entamando Iniciativa pol Asturianu y que xeneró gran interés ente dalgunos empresarios de Cangues.
