Discursu d’agradecimientu d’Inaciu Galán, Presidente d’Iniciativa pol Asturianu na entrega del premiu «N’alcordanza d’un país»:

Mui bones tardes a toos y toes:

Ye bien prestoso tar güei equí en Les Regueres nesta fiesta dedicada a la castaña valduna, nel conceyu onde una parroquia da-y nome a la meyor castaña del país. Presta abondo tar equí porque me consta l’esfuerciu de los vecinos y les vecines de Les Regueres por recuperar y poner en valor la castaña valduna, y presta tar nos pueblos onde la xente tira poles sos coses y pon en valor la so cultura.

En primer llugar y en nome de tolos miembros d’Iniciativa pol Asturianu quiero da-y les
gracies a l’asociación La Xordia por otorganos esti reconocimientu “N’alcordanza d’un país”, fainos muncha ilusión. Quiero tamién felicitar al profesor Ramón d’Andrés por recibir tamién esti reconocimientu y agradece-y el llabor pol idioma a los llargo de los caberos cuarenta años, aprovechando pa tener un recuerdu col so pá, Mánfer de la Llera, que tanto fixo tamién pol idioma, en tiempos difíciles pa ello. Sois una familia modelu na defensa del idioma.

Recibir esti reconocimientu préstamos especialmente porque facemos nestos meses siete años como entidá en defensa de la llingua asturiana. Siete años nos que tuvi la satisfación de presidir esta entidá y trabayar con munches persones, cada día más, por da-y futuru al asturianu. Fundámonos porque pensemos que podíemos aportar daqué al trabayu que yá se venía faciendo dende otres entidaes y dalguna instituciones, y paezmos que fuimos quien a da-y un calter nuevu a la reivindicación y a consiguir sumar a cada vegada más sectores de la sociedá asturiana a esti consensu pol asturianu, que pasa si queremos de verdá da-y futuru
pela midida qu’establez la Constitución: la oficialidá.

Güei, siete años más tarde de la nuesa fundación, tamos más cerca de dar los pasos necesarios pa da-y un nueva oportunidá al asturianu y siguimos trabayando pa implicar a más asturianos y asturianes, porque la llingua y la cultura d’Asturies nun ye patrimoniu de naide nin ta venceyáu a nenguna ideoloxía, ye de toos y toes, y ye un elementu pol que tenemos que trabayar xuntos.

Ye un casu asemeyáu al de la castaña valduna. Y de xuru que vos sorprende est aafirmación, pero ye asina. Equí en Les Regueres fuistis a ver la necesidá de ponela en valor y recuperala como elementu clave pa entender lo que sois como pueblu. Como pasaba y entá pasa col asturianu, los castañeos taben abandonaos o valtábense pa plantar ocalitos, perdiéndose un patrimoniu de gran valir. Y en Les Regueres vistis la fuercia y el valir de conservar esi frutu y de conservar esi espaciu que ye’l casteñéu, y acertestis y supistis ver que
pa se conserve esi patrimoniu ye necesario promocionalu, dalu a conocer, siguir cultivando castañales y siguir cuidando’l monte. Lo mesmos pasa col asturianu, necesita que sigamos cultivándolu, con bona lliteratura y
enseñándolu nes escueles, pa que se siga falando nes cases y promocionándolu y dándo-y presencia nos medios de comunicación, pa salga fuera y seya un elementu d’arguyu na sociedá, y non un elementu qu’hai qu’esconder.

Nos últimos tiempos tamos oyendo discursos disparataos contra l’asturianu. Dícenmos que la oficialidá ye malísima pa la sociedá asturiana, y amás quieren engañanos diciéndonos que l’asturianu pue mantenese ensin oficialidá y hasta ensin enseñalu nes escueles. Esto ye tanto como querer conservar la castaña valduna ensin facer amagüestos. Quieren facemos creer col asturianu, lo que pa la castaña sedría dalgo asina como querer dicinos que si dexamos medrar los ocalitos, dalgún día pueden dar castañes y vamos dir a la gueta.Pero los asturianos y les asturianes nun somos fatos, mayoritariamente queremos da-y futuru al asturianu, y la oficialidá ye’l principiu d’esi camín. Porque ye l’únicu que pue garantizar que los rapacinos y rapacines salgan de les escueles conociendo bien l’asturianu, y al conocelu bien, saber meyor tovía castellán y otres llingües. Y saber les dos llingües ye la única forma de garantizar la llibertá d’escoyer cuála queremos usar en cada momentu. Y tenemos que siguir convenciendo a más y más persones. Y los Conceyos, como esti de Les Regueres, tienen que trabayar colos sos vecinos, con más midíes de normalización, usando l’asturianu nes sos actividaes, na so cartelería, y los represenantes públicos, usando l’asturianu, como lo faen en casa, tamién cuando falen en públicu, convirtiéndose en modelu pa la sociedá a la que representen. Toos y toes tenemos responsabilidá nel futuru del asturianu. Tenemos de potencialu nel nuesu entornu y na nuesa familia, empresa, trabayu, o ellí onde teamos. Pero los represenantes públicos tienen un pocoñín más de responsabilidá, porque tienen más ferramientes pa meyorar la situación del idioma.

En Les Regueres va tiempu que vistis que la única manera de consiguir que se conserve la castaña, que vuelva a ser un elementu importante pa la economía del conceyu, ye faciendo amagüestos, ye promocionando’l so consumu, nun basta con dicir que somos mui amantes de la castaña. Y col asturianu hai que siguir esi mesmu camín, pa que nun seya un elementu namás pa “l’alcordanza d’un país”, como se llama esti reconocimientu que recoyemos güei, sinón pa que seya tamién un elementu pal futuru d’un país y de los sos habitantes. Y too ello ta nes vueses manes.

Munches gracies por esti premiu.

¡Puxa Les Regueres!
¡Puxa Asturies!