Iniciativa pol Asturianu detectó nestes selmanes dellos retrocesos na presencia del idioma nel conceyu de Xixón na programación festiva y cultural de branu. De manera concreta, la organización de reivindicación llingüística denuncia que nos eventos musicales de la Semana Grande nun había presencia dala de grupos de música n’asturianu: de toles intervenciones musicales nun había nenguna con cantantes n’asturianu resultando incomprensible que nun escaparate cultural como son los conciertos de la Semana Grande de Xixón queden fuera grupos o cantantes qu’usen l’asturianu nes sos actuaciones. Nesi sen, Iniciativa pol Asturianu llamenta comprobar que se materializase la promesa del presidente de Divertia, Oliver Suárez, de vetar a los grupos qu’usen l’asturianu col silenciu cómpliz del restu de partíos que conformen el gobiernu municipal como Foro y Partíu Popular. La presidenta d’Iniciativa pol Asturianu, Arantza Margolles, aprovechó pa treslladar que “tamos nuna clara regresión na presencia de la llingua asturiana nun solo nes cuestiones de cartelería, sinón tamién de programación. Facemos un llamáu al Conceyu de Xixón a la responsabilidá en materia llingüística y reclamamos frenar con esta actitú deliberada de bloquear la presencia de la llingua propia. Nun son de recibu estos pasos atrás nunos eventos nos que l’asturianu taba normalizáu y nun xeneraba nengún tipu de problema”.
D’otra manera, la entidá tamién manifiesta la so protesta pola desapaición de la llingua asturiana na cartelería de la Fiesta de la Sidra Natural de Xixón. Depués de munches ediciones de la organización d’esti festival, tan vinculáu cola cultura tradicional asturianu, el cartel ta únicamente en castellán incumpliendo les ordenances de normalización llingüística de Xixón. Amás, los folletos informativos sobre la Fiesta de la Sidra que se repartieron nes oficines turístiques tan únicamente en castellán.
La organización tamién recibió quexes pola desapaición de la toponimia tradicional en cartelería y rótulos, como ye’l casu de les nueves cámares de seguridá de la zona rural nes que únicamente apaez el topónimu deturpáu de ‘Gijón’ incumpliendo’l Decretu de Toponimia de Xixón.
Margolles añadió tamién que “vamos llevar al Conseyu Asesor de la Llingua Asturiana too esti recorte a la normalización del asturianu nel conceyu. Consideramos que nun se puede aprovechar la derogación del Plan de Normalización pa colar estos pasos atrás del idioma”.
Fin de fiestes con Danza Prima en castellán
Yá ye tradición que la Selmana Grande de Xixón pieslle cola interpretación y el baille de la Danza Prima nel paséu del Muru la mañana del 15 d’agostu faciendo siempres n’asturianu el cantu d’esta pieza popular. Sicasí, nesta edición usóse’l castellán nel cantar tradicional asturianu. Pa Iniciativa pol Asturianu esta ye una muestra más de la riestra d’involuciones relatives a la marcha atrás na presencia social y la normalización llingüística del Conceyu de Xixón.
