Iniciativa pol Asturianu abrió esti xueves el procesu de matrícula d’una nueva edición de cursos d’asturianu. La formación va desendolcáse a distancia, al traviés d’una plataforma dixital, dende’l 29 d’abril al 10 de xunetu d’esti añu 2026, 11 selmanes; lo qu’equivalen a 50 hores llectives. La formación va dividíse del siguiente mou: 25 hores de tutoríes a distancia -de manera obligatoria-, otres 20 de trabayu autónomu y 5 hores complementaries con delles actividaes que va proponer el tutor/tutora. Al final de la formación va facese una prueba. Esti tipu de modalidá a distancia favorez la autoorganización del alumnáu y permite-yos dir faciendo les actividaes, de manera más conveniente.
Esti nivel inicial ta empobináu a persones ensin formación de llingua asturiana o con nivel baxu de conocencia. Los estudiantes que superen la formación íntegra van algamar una acreitación de l’Academia de la Llingua Asturiana que certifica una formación d’asturianu d’un nivel A1. El preciu de la matrícula ye de 75 euros. Les persones asociaes a Iniciativa pol Asturianu van beneficiase d’un descuentu y solo tienen qu’abonar 60 euros. Toles persones interesaes pueden asociase nel momentu de la matrícula y disfrutar d’esti descuentu. Les inscripciones pal cursu pueden cubrise nun formulariu na propia páxina web d’Iniciativa pol Asturianu, onde tamién s’alcuentren toles condiciones pal mesmu, dende esti xueves 9 d’abril hasta’l día 23 d’esti mes.
Importante: Dientro del formulariu, alcuéntrense toles indicaciones pa faer el pagu de la matrícula del cursu.
