La incorporación de la toponimia oficial d’Asturies a tolos sistemes de Correos ye la Meyor noticia pal asturianu del añu 2022. L’anuncia de la empresa pública foi la que más sofitos recibió na votación popular qu’entama añalmente dende hai una década Iniciativa pol Asturianu. La ciudadanía valora’l compromisu de la compañía prestataria del serviciu postal universal, que comunicó en payares que yá entamara col procesu d’actualización de les sos bases de datos depués de numberoses reclamaciones. La nueva llega cuasique dos décades depués de l’aprobación de los primeros decretos. El procesu podría tar completáu nel primer trimestre del 2023.
La segunda noticia que más votos algamó foi l’anunciu de la incorporación gradual del asturianu nos servicios informativos de RTPA ya la so reconocencia como méritu en concursos y oposiciones llaborales. La tercer posición foi pal ésitu de Falamos, el proyectu pilotu de formación non reglada de les llingües asturiana y eonaviega pa persones adultes entamáu pola Federación Asturiana de Conceyos col sofitu de la Conseyería de Cultura, Política Llingüística y Turismu.
Siguen n’orde de votos l’aprobación d’una propuesta de resolución nel caberu alderique d’orientación política pola que la Xunta Xeneral encamienta al Gobiernu del Principáu a que’l B2 y el C1 puntúen como méritu nes oposiciones docentes. Darréu, en quinta posición, asítiase la decisión de la Universidá d’Uviéu de poner en marcha una Cátedra de Lliteratura Asturiana’l cursu qu’entra.
Iniciativa pol Asturianu fixo públicu esti llunes el resultáu de la votación popular, que nesta edición que volvió a ser un ésitu en participación per parte de la ciudadanía. La organización de reivindicación llingüística agradez la colaboración y participación a toles persones que participaron na escoyeta popular que cumplió 10 años de recoyer bones noticies.
