El presidentre d'Iniciativa pol Asturianu, Inaciu Galán dio una conferencia na Universidá d'Oxford, el pasáu 20 de marzu, y dientro del marcu del XVI Forum for Iberian Studies. Embaxo'l títulu "L'asturianu: l'anomalía d'una llingua non oficial nun estáu plurillingüe", Galán esplicó l'anómala situación llegal del asturianu, solo compartida col aragonés nel estáu español, como llingua ensin reconocimientu d'oficialidá dientro del marcu d'un estáu con otres llingües oficiales.
Na conferencia apurrió al públicu casos de discriminación y fizo un repás a la hestoria de la situación llegal del asturianu, sobre manera nos trenta años últimos, incluyendo l'aprobación del Estatutu d'Autonomía, la Llei d'Usu del Asturianu y les movilizaciones tratando de forzar un cambiu nel estatus llegal, la que calificó como la más vieya reivindicación de los asturianos.
La conferencia, a la que se dio llectura n'asturianu na Taylor Institution xeneró gran interés ente'l públicu presente, que conociendo poco sobre la realidá de la llingua asturiana, tuvo interés en conocer la so presencia en medios de comunicación, na escuela, y en xeneral, na sociedá asturiana.
Inaciu Galán fizo amás una donación de llibros n'asturianu a la Universidá d'Oxford, ente los que tán el so diccionariu asturianu-inglés/inglés-asturianu, que yá ta disponible nes estanteríes de la instución universitaria, pa la conocencia de la nuesa llingua ente los investigadores y alumnos.
