L’entamu del enseñu de forma reglada l’enseñu del asturianu y l’eonaviegu nel segundu ciclu d’Educación Infantil ye la Meyor Noticia pal Asturianu del añu 2025. Ye la opción más votada na consulta entamada por Iniciativa pol Asturianu. D’esta manera, la ciudadanía sofito de manera mayoritaria esti pasu alantre na inclusión de les llingües propies nesti tramu inicial de la educación. Esta noticia tien especial interés porque yera un tramu de la enseñanza na que l’asturianu entá nun taba presente. Tanto la Carta Europea de les Llingües como la propia Llei d’Usu y Promoción del Asturianu afalen n’implantar l’enseñu de les llingües propies en tolos niveles educativos. Amás, esta foi una reclamación constante d’Iniciativa pol Asturianu pa procurar la tresmisión xeneracional del idioma nesti primer contactu educativu.
Ente les siguientes noticies más votaes asitiáronse al empar l’enseñu del asturianu na Escuela Oficial d’Idiomes d’Uviéu y l’estrenu en TPA de L’abeya Maya, la serie de dibuxos animaos doblada al asturianu orientada al públicu infantil.
Otres noticies mui valoraes polos participantes fueron el sofitu mayoritariu de la Xunta Xeneral a la oficialidá del idioma recibiendo los votos de la mayoría absoluta de la cámara y la meyora del porcentaxe de matriculación na asignatura d’asturianu que medró un 34,2%.
Iniciativa pol Asturianu fixo públicu esti llunes el resultáu de la votación popular, que nesta edición volvió a ser un ésitu de participación durante los díes de votación. La organización propulsora de la votación agradez la collaboración y participación a tola ciudadanía que s’implicó na escoyeta popular que cumplió trece años de recoyer bones noticies pa la llingua asturiana asina como pa reconocer tolos pasos alantre na normalización del idioma.
