La situación del asturianu ye complicada, esa ye una realidá. Y anque la sociedá asturiana tien una bona disposición pa col idioma y nun quier que desapaeza, lo cierto ye que namás una parte pequeña de la xente asturiano ta movilizao nesa llucha diaria que ye busca-y un futuru meyor a la nuesa llingua. Mientres, el restu, con mayor o menor simpatía, ven a esti movimientu de recuperación llingüística como dalgo ayeno a ellos.
Los que tamos concienciaos tenemos que facemos una entruga, ¿tamos faciendo lo suficiente? Ye necesario que toos pongamos más esfuerciu diariu, porque siempres podemos facer más. Y sobe manera, tenemos que de ser conscientes, esta llucha namás se gana d’una manera, convenciendo a más y más asturianos y asturianes cada día, ganando simpatizantes pa esta xusta causa que ye garantizar los drechos de los falantes d’asturianu y el futuru del idioma, que sigue en grave peligru.
Munches vegaes tendremos de tratar de convencer a xente con munchos prexuicios y que de xuru dirán coses que pueden ofender a la sensibilidá de les persones que yá tán concienciaos de la importancia de salvar al asturianu, pero tenemos que ser pacientes y dir faciendo conciencia, desaniciando prexuicios y ganando simpatíes. Porque namás sumando persones llograremos una fuercia social que mos permita llograr l’oxetivu de facer normal a la llingua asturiana.
Queremos convencer a más d’un millón de persones de la necesidá de qu’usen l’asturianu, de que reclamen un estatus d’oficialidá pa la llingua asturiana, y pa ello tenemos qu’entamar na rodiada de caún, nel nuesu grupu d’amigos, na familia, nel trabayu… ¿Yá consiguisti convencer a to padre o a to güela de que s’implique? Tu que yá yes sociu d’Iniciativa pol Asturianu, ¿consiguisti asociar al to hermanu o al to cuñáu?
Ye importante implicar a les persones que mos arrodien, teneles al tantu de l’actualidá y facer porque conozan por qué lluchamos, porque ye una causa que bien esplicada tien difícil oposición. Nun falemos cola xente solo de términos abstractos como oficialidá o normalización, falémos-yos de que nun se pierdan les pallabres de los sos güelos, de que l’asturianu tenga futuru, de qu’Asturies nun pierda fondos nos presupuestos del Estáu mientres otres comunidaes con llingua propia sí los aprovechen. Falémos-yos de coses tanxibles, con un llinguaxe amable y ensin dar por fecho que van tar a la escontra o que saben del tema, porque munchos asturianos nun saben nada o cuasi nada de la situación de la so propia llingua.
Coincidiendo con esti mes de setiembre, nel que se celebra'l Día d’Asturies, ye una bona ocasión pa recordar a les persones que t’arrodien, que s’impliquen y conviertan esi amor que tolos asturianos espresen por Asturies, nuna actividá real en defensa de les sos señes d’identidá. Y convecelos pa facese socios d’Iniciativa pol Asturianu ye una forma, que xunto a otres, pue ser pa munches persones el comienzu d’un llabor pol idioma nel que necesitamos de munches manes trabayando.
