Coincidiendo con esti Día Internacional de la Llingua Materna, que se celebra en tol mundu pa salvaguardar les más de 3.000 llingües que tán en dalgún tipu de peligru, presentemos un proyectu col que llevamos munchu tiempo suañando y col que queremos da-y más visibilidá al consumu de productos etiquetaos n’asturianu, al mesmu tiempu que concienciamos a los consumidores na importancia de mercar estos productos y servicios, sofitando a les empreses que tienen esti compromisu llingüísticu.
Dende Iniciativa pol Asturianu y en collaboración con Bayura, productora xixonesa de cerveza artesano, comprometida y muncho col usu del asturianu, sacamos alantre esta iniciativa, la Cerveza pol Asturianu, la cerveza que-y presta a la to llingua.
Pretendemos ufiertar al públicu un productu de calidá col que faer atractivo collaborar con Iniciativa pol Asturianu y el nuesu llabor, col qu'introducir l'usu del asturianu n'espacios onde davezu nun suel tar presente. Ufiertar una forma prestosa de da-y sofitu al asturianu, con un xestu tan cenciellu como tomar unes cerveces colos amigos en cualquier establecimientu, o llevales pa casa y poneles nuna cena.
Pa ello, faemos una tirada inicial de 5.000 cerveces pol asturianu que van distribuyise en llocales y tiendes de productos de calidá, amás de nos actos nos que participemos y en folixes y otros eventos onde los organizadores quieran cuntar con un productu comprometíu col asturianu y que xenera ingresos que van revertir na llucha polos drechos civiles de los falantes d'asturianu y la normalización social del idioma.
La etiqueta de la Cerveza pol Asturianu busca llamar l'atención de forma positiva sobre l'oxetivu principal, col lema yá citáu "La cerveza que-y presta a la to llingua", xugando col tastu d'esta cerveza (del que mos falará meyor dempués Serxu Solares, de Bayura) El diseñu ye obra d'Alex Ordiales, miembru d'Iniciativa pol Asturianu y diseñador gráficu de llarga esperiencia. Foi él quien diseñó la imaxe corporativa d'Iniciativa pol Asturianu y de munches de les que fueron esitoses campañes de reivindicación.
Esti productu sal amás coincidiendo colos primeros cinco años d'actividá d'Iniciativa pol Asturianu, polo que ye tamién una forma de festexar un llustru d'esta organización, que dempués d’esti tiempu consiguió convertise en referencia importante na reivindicación del asturianu, con quexes y reivindicaciones, claro que sí, pero tamién con munches pontes de collaboración construyíes con instituciones, asociaciones y empreses.
Involucrámonos agora con esti proyectu nun camín qu’esperamos poder compartir con más empreses comprometíes col asturianu. Queremos sumar con toles fuercies nesti procesu de normalización al sector socioeconómicu, y pa ellos nun queda otra que convencer a les empreses de los valores positivos d’usar l’asturianu, de la ventaya competitiva que supón; y a los consumidores, de la necesidá de sofitar cola compra y contratación de productos, n’empreses qu’usen l’asturianu.
