Esti vienres 3 de mayu los asturianos y asturianes vamos volver a salir a la cai pa reivindicar la reconocencia del estatus llegal d’oficialidá pal idioma nel Día de les Lletres Asturianes. Dende Iniciativa pol Asturianu sofitamos un añu más esta manifestación, participando de la marcha y animando a tolos nuesos socios, simpatizantes y en xeneral, a la sociedá asturiana, a llevantar la voz pola so llingua, que carez tanta necesidá d’acción per parte de les alministraciones, asina como polos falantes, que siguen ensin ver los sos drechos civiles básicos reconocíos.

Iniciativa pol Asturianu ye una organización que ñació pa implicar a tola sociedá asturiana nel procesu de recuperación y normalización del asturianu, y polo tanto camienta imprescindible que la sociedá s’implique y faiga oyer la so voz, que ye mayoritariamente favoratible a que l’asturianu se convierta nuna llingua normal, que pueda usase en tolos ámbitos y que tenga garantizáu’l so futuru, lo que solo ye posible si esta llingua ye oficial.

Col lema «Oficialidá, el camín constitucional de futuru pal asturianu» van repartise pegatines pela mañana, de 10:00 a 13:00 hores, na oficina d’Iniciativa pol Asturianu (Avenida Manuel Llaneza, 68, baxo, Xixón) y pela tarde na propia manifestación.

La Manifestación pola Oficialidá va salir el vienres 3 de mayu a les 19:30 hores de la Estación del Norte d’Uviéu. Animamos a toles persones enfotaes nel futuru del idioma a participar con nós na manifestación organizada pola Xunta pola Defensa de la Llingua Asturiana.

Iniciativa pol Asturianu recuerda dempués de la manifestación va celebrase nel Teatru Campoamor la Xunta Estraordinaria de l’Academia de la Llingua Asturiana y que la entrada ye llibre y de baldre. Animamos a la xente a participar d’esti actu de sofitu a la institución, qu’esti añu va nomar académicos al escritor Pablo Texón y el filólogu Alberto Fernández Costales a los que queremos da-yos la norabona.