Iniciativa pol Asturianu treslladó esta mañana a la Conseyería delles propuestes p’avanzar na presencia del asturianu y del gallego-asturianu nel sistema educativu. El vocal de rellaciones institucionales d’Iniciativa pol Asturianu, Inaciu Galán aconceyó cola conseyera d’Educación, Lydia Espina, y col director xeneral d’ordenación, evaluación y equidá educativa, David Artime, pa treslladar demandes, midíes y propuestes pa la presencia de les nueses llingües na escuela. El representante de la organización de reivindicación llingüística pidió a los responsables de la Conseyería d’Educación buscar un encaxe normativu pa la presencia de la llingua asturiana y el gallego-asturianu nel currículu d’Educación Infantil. “Ye especialmente importante la presencia de la materia nesta etapa pa caltener l’idioma que los y les neñes sienten en casa y p’afitar la matriculación na asignatura na etapa de primaria” apuntó Galán.
La organización tamién treslladó a Espina la so preocupación pola situación de l’asignatura de Llingua Asturiana y Lliteratura nes etapes de la ESO y Bachilleratu, reclamando un aumentu d’hores, especialmente en Bachilleratu, onde nesti momentu cunta namás con una hora semanal, frente a les cuatro que llegó a tener, y compitiendo con otres asignatures. N’otros casos, como ye’l casu de la ufierta del idioma nel Bachilleratu a distancia nin siquiera apaez la ufierta de l’asignatura, cuestión que dende la Conseyería se comprometieron a correxir.
Galán añadió que “nun podemos cayer nel error de confundir optatividá con voluntariedá, que ye lo que recueye’l marcu actual de la Llei d’Usu” y criticó que “facer competir l’asignatura d’asturianu con otres materies resulta un error y ye contrario al espíritu de la Llei d’Usu”.
Nesi sen, Inaciu Galán aprovechó pa recordar el bon funcionamiento del Plan Pilotu pa la inclusión del asturianu como llingua vehicular en delles asignatures de Primaria, desarrolláu nel añu 2017, que funcionó mui bien, participando hasta 10 centros educativos y a costu cero. “Treslladamos a la responsable d’Educación del Gobiernu d’Asturies la posibilidá de valorar la recuperación d’esta iniciativa, que dende entós nun volvió a repitise”.
El conceyu tamién valió pa manifestar a la conseyera la necesidá d’aportar mayor importancia a la materia valorando la posibilidá d’optar al nivel B2 d’asturianu al cursar íntegramente l’asignatura en tola etapa educativa o de facer una prueba d’asturianu dientro de la EBAU p’aquel alumnáu que fai l’asignatura en Bachilleratu.
Sobre la especialidá docente, el vocal de rellaciones institucionales d’Iniciativa pol Asturianu recordó que “esta ye una decisión política y que tamos nuna situación ilóxica na que tolos responsables (Ministeriu d’Educación, Conseyería d’Educación, Xunta Xeneral…) tán d’alcuerdu pero nun son quien a buscar una igua definitiva pa esta cuestión. Ye clave ameyorar la situación del profesoráu, como nos treslladaron los sindicatos del ámbitu de la educación, colos qu’aconceyemos va unos díes”.
Dientro del conceyu, Iniciativa pol Asturianu pidió a la Conseyería d’Educación facer un esfuerciu pa treslladar a la Universidá d’Uviéu la reclamación de l’ampliación de places del máster del profesoráu d’Educación Secundaria, yá que la demanda ye mui alta y ye la manera de siguir formando a profesionales pa impartir l’asignatura de Llingua Asturiana, que nesti momentu tien un importante déficit de profesoráu, especialmente en Secundaria.
Iniciativa pol Asturianu tamién treslladó a los responsables de la Conseyería d’Educación delles iniciatives como l’usu normal del asturianu en diferentes actos per parte de la conseyera, la renovación progresiva de la cartelería nos centros educativos, pa que’l paisaxe llingüísticu de los centros tea tamién n’asturianu. La entidá amás reclamó mayor celeridá na publicación de les campañes de matriculación n’asturianu pa llegar a tiempu pal procesu de la prematrícula, asina como un esfuerciu xeneral pa que dientro de la Conseyería s’use’l propiu idioma y la toponimia oficial, recibiendo una respuesta positiva nesti sen.
El balance ye positivu dende Iniciativa pol Asturianu, no que cinca a l’actitú de la conseyera, pero d’escepticismu pola falta d’acción nestos meses y pol pocu tiempu de llexislatura que queda. «Ye necesario demostrar con fechos que signifiquen avances reales, les bones pallabres d’esti gobiernu pa col asturianu. Ye bien positivu’l cambiu d’actitú frente a executivos anteriores, pero ye necesario que cristalice en fechos que supongan una diferencia significativa pa la presencia del idioma nel sistema educativu. El marcu llegal actual permite dar munchos pasos alantre que permitan preparanos pa la oficialidá».
Sienti equí les declaraciones d’Inaciu Galán, rellaciones institucionales d’Iniciativa pol Asturianu.
