La Conseyería de Servicios y Drechos Sociales publica un documentu nel qu’esixe que la documentación aportada namás pueda facese en castellán
“Esta condición espuesta en mayúscules y en negrina na solicitú oficial de la Conseyería supón una infracción mui grave de la Llei d’Usu”
Inaciu Galán, presidente d’Iniciativa pol Asturianu, dixo esta mañana que “Iniciativa pol Asturianu va rexistrar una quexa formal énte’l Gobiernu del Principáu d’Asturies pola publicación d’un documentu de la Conseyería de Servicios y Drechos Sociales nel que s’espón de manera clara que “toda documentación deberá presentarse en Lengua Castellana”. Esti requisitu resulta absolutamente illegal yá que la Llei d’Usu nel so artículu 4, referíu al usu alministrativu, diz que ‘Tolos ciudadanos tienen drechu a emplegar el bable/asturianu y a espresase n’él, de pallabra y por escritu y que tendráse por válido a tolos efeutos l’usu del bable/asturianu nes comunicaciones orales o escrites de los ciudadanos col Principáu d’Asturies’. Polo tanto, cualquier ciudadanu puede presentar documentación n’asturianu. Esi requerimientu ye illegal».
“Va unes selmanes denunciamos qu’una funcionaria reclamó a una ciudadana que nun usare l’asturianu de forma oral nuna comunicación. Nesti casu, tamos énte una convocatoria oficial d’una conseyería del Gobiernu d’Asturies que pide, en mayúscules y en negrina, que nun s’utilice otra llingua que nun seya’l castellán lo que supón saltase’l mandatu de la Llei”, apuntó Galán.
El presidente de la organización comentó tamién que “solicitamos la retirada inmediata del documentu, la eliminación del requisitu qu’esixe que solo se presente documentación en castellán y amás la publicación de formularios en billingüe asturianu/castellán. Si’l tope pal Gobiernu actual no que cinca a la llingua asturia ye la Llei d’Usu, animamos a los sos miembros a que la cumplan de manera real, sinón ye una tomadura de pelo”.
P’acabar, Galán añadió que “esti tipu de situaciones evidencien que l’asturianu ye una cuestión tresversal a toles conseyeríes, nun solo afecta a la Conseyería d’Educación y Cultura, y afita una vegada más la necesidá de la oficialidá de la llingua asturiana. Nuna situación onde los drechos llingüísticos tean igualaos (asturianu/castellán), nun taríemos denunciando esta discriminación”.
