Iniciativa pol Asturianu reclama al Conceyu d’Uviéu una rempuesta contundente énte l’intentu del grupu municipal de Vox d’anular la toponimia oficial de la ciudá na documentación de la ZBE (Zona de Baxes Emisiones). La entidá considera que ye importante desplicar qu’aplicar los topónimos tradicionales y oficiales ye cumplir la llexislación vixente en materia toponímica. Nesi sen, Iniciativa pol Asturianu recuerda que’l Decretu 14/2019, de 13 de marzu, pol que se determinen los topónimos oficiales del Conceyu d’Uviéu, afita l’usu del nome tradicional de la capital col códigu 44 19 01.
La organización de reivindicación llingüística apunta amás qu’utilizar el nome tradicional axústase plenamente a la Llei d’Usu que nel puntu 1 del artículu 15, relativu a toponimia, recueye que “Los topónimos de la Comunidá Autónoma del Principáu d’Asturies han tener el nome oficial na so forma tradicional. Pal casu de qu’un topónimu tenga usu xeneralizáu na forma tradicional y en castellán, el nome podrá ser billingüe.”
Iniciativa pol Asturianu insta al equipu de Gobiernu d’Uviéu a desestimar la enmienda presentada pol grupu municipal de Vox relativa a la presencia del topónimu oficial y tradicional d’Uviéu na documentación de la ZBE y a facer una clara defensa de la Llei d’Usu. Dende’l colectivu consideren que ye una oportunidá d’oru pa faer una defensa del patriminiu llingüísticu, de la toponimia y de la Llei d’Usu que’l Partíu Popular d’Asturies defende. “Ye’l momentu d’apostar pola llei, pola convivencia y pol alcuentru frente a la división y la esclusión llingüística. El PP d’Asturies y el PP d’Uviéu tienen la obligación de defender la cultura y la llei frente a postures fuera de la Constitución. Nun se pue aceptar que postures contraries a la Llei y a la realidá llingüística permitan l’anulación de la presencia de la toponimia oficial”.
“Va unes selmanes el PP recordaba y homenaxeaba la figura de Sergio Marqués y de la obra del so gobiernu. Ún de los fitos del mesmu, foi aprobar la Llei d’Usu. Güei reclamamos valentía al PP pa defender la convivencia de les llingües frente a un clima d’anulación y de crispación como se pretende dende la oposición” argumenta la presidenta de l’asociación, Arantza Margolles.
Asinamesmo, por mor d’esta situación, Iniciativa pol Asturianu vuelve reclamar al gobiernu carbayón una campaña d’información y sensibilización alredor de la toponimia tradicional de la ciudá y un usu escrupulosu en tolos ámbitos, más que necesariu si quieren qu’Uviéu tenga dalguna opción de ser Capital Europea de la Cultura.
