Iniciativa pol Asturianu reclama axilidá al Conceyu de Xixón pa retramitar un nuevu Plan de Normalización Llingüística depués de la sentencia del Tribunal Superior de Xusticia d’Asturies que confirma l’anulación de la norma de Xixón tres el recursu de Vox. La entidá de reivindicación llingüística considera que nun se puede perder más tiempu en recursos y que ye’l momentu de llograr un alcuerdu municipal p’aprobar nel menor tiempu posible un plan que s’axuste a los requisitos llegales.
La presidenta d’Iniciativa pol Asturianu, Arantza Margolles, declaró que “la sentencia afala claramente al reconocimientu xurídicu de la llingua asturiana, recalcando que los Planes de Normalización Llingüística tienen un calter normativu; esto significa que son normes qu’hai que cumplir y llevar alantre”.
Margolles añadió que “demientres s’anula’l Plan, se recurre y se pierde más tiempu con estes cuestiones llegales, en Xixón siguen los pasos atrás cola presencia que denunciamos va unes selmanes. Mesmamente, a piques d’entamar la Nueche Blanca 2025, una xornada vinculada a la cultura, esti eventu nun cuenta con nenguna actividá n’asturianu. La preocupación que tenemos sobre la presencia del asturianu nel conceyu de Xixón va medrando porque tamos viendo pasos atrás y siguimos perdiendo’l tiempu con recursos sobre un Plan de Normalización anuláu; frente a estratexes efectives como l’aprobación d’un nuevu documentu”.
La organización de reivindicación llingüística esixe una rempuesta política contundente de los partíos políticos implicaos na normalización del idioma y llograr un consensu políticu p’aprobar un Plan de Normalización de Xixón de calter urxente.
