Iniciativa pol Asturianu esixe que’l resultáu electoral d’esti 28 de mayu se convierta nun compromisu de los partíos que llevaron la oficialidá nel programa pa que se faiga un avance de máximos pal desendolque de la Llei d’Usu y Promoción del asturianu, vixente dende l’añu 1998. La organización destaca que la suma de los partíos que lleven la oficialidá nel programa electoral vuelve a ser mayoría na Xunta Xeneral del Principáu d’Asturies. Les candidatures de FSA-PSOE, Convocatoria por Asturies, Podemos Asturies y Foro Asturias, que sumen 24 escaños.

Agora, más que nunca, ye necesario buscar alcuerdos p’avanzar y trabayar nun Plan de Normalización Llingüística que se ponga en marcha dende’l primer día de gobiernu. Nun pue volver a perdese’l tiempu na dignificación del asturianu y l’eonaviegu, nin nel gobiernu autonómicu nin nos conceyos, en nengún ámbitu, pero muncho menos naquellos que van tar gobernaos por partíos que lleven la oficialidá nel programa.

La organización considera que ye’l momentu tamién de siguir trabayando na busca de nuevos consensos al rodiu de la oficialidá de les llingües d’Asturies, sumando voluntaes, llogrando abrir nuevos espacios pal idioma y consiguiendo concienciar a los partíos políticos qu’entá nun se sumaron al consensu constitucional, del valor de los nuesos idiomes y de la so supervivencia. Asturies nun pue siguir siendo una anomalía en derechos llingüísticos y protección del patrimoniu inmaterial que son les nueses llingües.