Iniciativa pol Asturianu reclama a los candidatos al rectoráu de la Universidá d’Uviéu compromisos concretos pa cola llingua asturiana. La institución académica celebra’l viniente 12 de febreru la votación pa escoyer al nuevu rector. La organización quier que los dos candidatos qu’opten al cargu, Santiago García Granda ya Ignacio Villaverde, s’involucren pa peracabar coles situaciones de discriminación llingüística na universidá asturiana. D’esta manera, la organización reclama, como un primer pasu, que se lleve a términu la puesta en marcha d’una oficina de normalización con personal propiu dientro del organismu universitariu, tal y como ta previsto y s’alcordó en payares de 2019 cola Dirección Xeneral de Política Llingüística.

La organización tamién entiende que ye necesariu’l compromisu de los candidatos con un billingüismu cien por cien real na institución, na que se puedan presentar tesis y Trabayos Fin de Grau (TFG) n’asturianu, en plena igualdá de condiciones coles demás llingües; que los trabayos n’asturianu puedan optar a premios; y que s’establezan categoríes diferentes pal premiu lliterariu. Asina mesmo, la entidá reclama la creación d’un Grau de Llingua Asturiana y otru de Periodismu que s’imparta n’asturianu. Pa Iniciativa pol Asturianu ye imprescindible que la institución académica avance na visibilización de la llingua asturiana, llevándola a la cartelería de los sos edificios y a les redes sociales.

Discriminación

Con estes propuestes, Iniciativa pol Asturianu quier que la Universidá d’Uviéu se convierta nun referente de la normalización llingüística y ponga fin a la discriminación que sufren los estudiantes que quiere usar l’asturianu nesta etapa académica. A mediaos d’ochobre del añu pasáu, la organización denunció que Raúl Alonso, un estudiante del Grau d’Historia que decidió escoyer l’asturianu como llingua pa entregar y defender el so TFG, pero nun pudo facelo porque dende l’alministración de la institución universitaria se-y negó esi derechu.

Iniciativa pol Asturianu yá fizo pública esta inxusta situación n’aquel momentu y agora, en plena campaña pa elexir rector de la Universidá, la organización entruga a los candidatos al traviés d’un videu col afectáu: “¿Qué puede facer el Rector pa iguar esta situación?”, “¿Qué van facer los candidatos a rector nel momentu nel que ganen les elleiciones?”. La organización esixe soluciones pa qu’el casu de Raúl seya l’ultimu casu de discriminación llingüística na Universidá d’Uviéu.