Iniciativa pol Asturianu ta acabante de presentar una reclamación ante la Conseyería de Transición Ecolóxica, Industria y Desarrollu Económicu pol escaezu de la llingua asturiana na nueva marca y comercial ‘Artesanía de Asturias’. El Boletín Oficial del Principáu d’Asturies espublizó’l 9 de febreru’l decretu 5/2024, de 27 de xineru pol que se dispón l’adquisición del drechu de propiedá de la marca únicamente en castellán ensin tener en cuenta les llingües propies d’Asturies.
La organización de reivindicación llingüística fizo llegar una reclamación a la conseyera de Transición Ecolóxica, Industria y Desarrollu Económicu, Nieves Roqueñí, reclamando la modificación del citáu decretu. La entidá reclama que s’incluya l’adquisición de la propiedá y, sobremanera, l’usu de la versión n’asturianu de la marca y del nome comercial ‘Artesanía d’Asturies’.
Iniciativa pol Asturianu argumenta qu’esta decisión aportaría un valor añadíu a los productos incluyíos nesta iniciativa comercial. “Si l’oxetivu de l’adquisición d’esta marca y nome comercial ye dotar de mayor visibilidá y reconocimientu a la industria de l’artesanía asturiana, la llingua propia ye fundamental pa llograr esi fin”.
L’asociación reclama una rectificación urxente por esti anunciu pol so “despreciu absolutu pola llingua asturiana”. L’asturianu y l’eonaviego aporten un valor añadíu, amás de llograr una meyor identificación, apegu al territoriu de los productos, promover la difusión, protexer y mantener el prestixu y fomentar la so comercialización de los productos de l’artesanía asturiana.
