Iniciativa pol Asturianu ta acabante de presentar una reclamación énte la Conseyería d’Educación del Gobiernu del Principáu d’Asturies pol recorte d’hores de la materia de Llingua Asturiana y Lliteratura nel Colexu de La Milagrosa de Xixón.

Anteriormente, la Conseyería d’Educación otorgaba pal centru un repartu horariu de 9 hores pal enseñu de la materia na etapa d’Educación Primaria (1,5 hores por nivel), pero esti cursu académicu la Conseyería reduz esa dotación y pasa a cuntar con 7 hores y media. El colexu tien una llinia únicamente; y por mor d’esta decisión, la docente tien d’axuntar dos grupos de niveles distintos (3u y 4u primaria) conformando un grupu de más de 20 escolinos.

Esta situación nun ocurre cola otra asignatura optativa (Cultura Asturiana) lo que supón una discriminación pa l’asignatura de Llingua Asturiana y Lliteratura que perxudica al alumnáu matriculáu y al enseñu de la propia materia. A esto hai qu’añadir qu’esta situación de xuntanza de grupos podría provocar un cambéu d’optativa de cara al cursu siguiente, como yá pasó n’otros centros educativos en situaciones asemeyaes; munches families rechazaben esta xunión de niveles y camudaben la matrícula pal cursu viniente amenorgando la matriculación d’asturianu.

El centru educativu yá presentó alegaciones por esta decisión de la Conseyería d’Educación qu’hasta esti momentu nun llograren, por desgracia, solucionar esta situación.

Iniciativa pol Asturianu reclama la restitución de la dotación horaria a les 9 hores nel Colexu La Milagrosa de Xixón; que la materia de Llingua Asturiana y Lliteratura tea nes mesmes condiciones que’l restu; y non xenerar una discriminación pa l’asignatura y el so alumnáu.