Iniciativa pol Asturianu echa andar el Buzón del Asturianu. Esta ferramienta nueva ye un serviciu gratuitu abiertu a tola ciudadanía pa canalizar les quexes ante alministraciones, instituciones y empreses que vulneren los drechos llingüísticos de los falantes. Al traviés d’esta canal tamién se van poder treslladar suxerencies, propuestes y felicitaciones a aquelles organizaciones que seyan un exemplu y den pasos alantre pa garantizar el drechu a vivir n’asturianu. D’esta manera, la organización de reivindicación llingüística quier animar a tola ciudadanía a conocer y exercer los sos drechos.
El buzón ta yá disponible na páxina web d’Iniciativa pol Asturianu. Les persones interesaes en comunicar cualesquier denuncia, felicitación o, simplemente, dalguna consulta, namás van tener que rellenar un formulariu, que van poder complementar con semeyes y documentos. La entidá comprométese a protexer l’anonimatu de les persones que se pongan en contactu con nós al traviés d’esti serviciu. Sicasí, nun se van almitir comunicaciones anónimes.
El presidente d’Iniciativa pol Asturianu, Iván Llera, destacó que “dende va tiempu venimos recoyendo una bayura de quexes y discriminaciones pol usu llibre del idioma y queremos siguir cola nuesa llabor de visibilización de la represión llingüística. Queremos intensificar esta llabor de denuncia nun momentu nel qu’hai que siguir evidenciando una carencia de drechos llingüísticos”. Llera recordó que “Iniciativa pol Asturianu ye una asociación que quier trabayar en positivo. Eso significa que tenemos la misión de reconocer tolos pasos alantre nel usu del asturianu tanto nes instituciones públiques como n’espacios privaos. Por ello, tamién ufrimos la posibilidá de faer llegar felicitaciones sobre campañes, usu del asturianu n’eventos o iniciatives privaes y felicitar otres iniciatives favorables pa les nueses llingües”.
El Buzón del Asturianu quier ser un espaciu abiertu a la sociedá y un instrumentu pa llograr visibilizar la realidá llingüística del asturianu y del eonaviego. Con toles denuncies, suxerencies, felicitaciones y consultes recibíes, Iniciativa pol Asturianu va ellaborar un informe añal, que va permitir facer siguimientu de cuáles son les problemátiques que más afecten a la ciudadanía.
