Iniciativa pol Asturianu fixo llegar una carta estos díes al nuevu Gobiernu d’España presidíu por Pedro Sánchez pa poner en marcha la solución de delles cuestiones pendientes dende va años y de fácil solución per parte de distinto ministerios.
Ente les peticiones feches dende la ONG tán la modificación del decretu d’especialidaes pa incluyir la especialidá docente d’asturianu. Esta midida, que lleven la mayoría de partíos nel so programa, incluyendo’l PSOE, y tien el consensu de la Xunta Xeneral, nun tien nengún costu y permitiría que’l profesoráu d’asturiau dexe de ser interín de forma indefinida y puedan convocase places per esta especialidá nes oposiciones.
Reclamen tamién que la Delegación de Gobiernu n’Asturies la retirada de tolos recursos contra los reglamentos de los Conceyos pa la normalización y l’usu del asturianu que punxere en marcha l’alministración anterior.
Al Ministeriu de Fomentu y en xeneral, a tol Gobiernu d’España, piden tamién el cumplimientu de la toponimia oficial de los conceyos d’Asturies en tola Alministración Central, incluyendo la corrección de les señales, a la que yá se comprometió con esta entidá la Delegación de Gobiernu en conceyu celebráu nel mes de marzu de 2015. De la mesma forma, reclamen a Adif, l’usu correctu de la toponimia oficial nes estaciones de tren, billetes, web, etc.
Piden que l’alministración central use l’asturianu de forma habitual en campañes estatales, versiones de páxines web oficiales, etc. Yá que la non oficialidá nun impide l’usu d’una llingua protexida n’España, tal y como afita la Carta Europea de les Llingües Minoritaries, roblada pol gobiernu español.
No que cinca al Ministeriu de Cultura reclamen una atención mayor a la llingua asturiana en tolos ámbitos, que se busque la forma d’incluyir a la llingua asturiana nos premios nacionales de lliteratura y otres iniciatives, como la difusión per parte del Instituto Cervantes. De la mesma forma soliciten que se busque una fórmula pa da-y financiación estatal a l’Academia de la Llingua Asturiana, única de les entidaes d’esti tipu que nun tien financiación estatal.
