Pa la organización esta midía podría dar muncha visibilidá al idioma y amás nun supondría nengún costu estra 

XIXÓN, 17/07/2019. Iniciativa pol Asturianu reclamó güei al Conceyu de Xixón l’usu y la presencia del asturianu nes comunicaciones del Serviciu de Salvamentu de Xixón. Acabantes de salir la llicitación del contratu técnicu de la megafonía, la organización animó a usar la llingua asturiana dientro d’estes comunicaciones relatives a les hores, la temperatura y del serviciu de Salvamentu de les sableres.

Dende la organización pídese esti cambéu porque daría muncha visibilidá y normalidá al idioma nesti espaciu multitudinariu de Xixón y amás esta midía nun supondría un costu estra pa l’Alministración. La entidá recuerda que ye mui necesario que l’asturianu vaya ganando pesu en diferentes ámbitos y siga llogrando un usu normal de la llingua asturiana faciéndolo, amás como ye nesti casu, ensin suponer un gastu añadíu.

Pa finar, Iniciativa pol Asturianu recordó qu’esta solicitú nun afeuta a la llitación del contratu nin implica la so modificación.