La ONG esixe que respete la voluntá d’elección de los padres a la hora d’escoyer asturianu na ufierta educativa y que nun menosprecie el deprender asturianu

“Ye completamente inalmisible declaraciones d’esi tipu nun centru educativu sobre una asignatura na que tolos años atopamos problemes pa matricular alumáu y que per tantos años tuvo arrequexada nel sistema educativu”

“Tan importante ye deprender asturianu como inglés, la educación nun se puede convertir nuna competición absurda pola supuesta utilidá de los conteníos nin les asignatures”

Fonsu Martín, responsable de la estaya d’enseñu d’Iniciativa pol Asturianu, fixo pública esta mañana la so decepción poles pallabres del alcalde de Siero, Ángel García, na visita que realizó al Colexu Rural de Viella pa inaugurar el cursu escolar. Dempués de que la conceyala d’Educación Aurora Cienfuegos convidare a los escolinos a deprender más vocabulariu n’asturianu, l’alcalde retrucó que “meyor l’inglés”.

El vocal d’enseñu añadió que “dende Iniciativa pol Asturianu pidimos al alcalde de Siero que respete la voluntá d’elección de los padres a la hora d’elexir asturianu na ufierta educativa y que nun menosprecie el deprender asturianu. Pidimos a la FSA-PSOE que desautorice estes llamentables declaraciones.”. Asina mesmo queremos felicitar a la conceyala d’educación por promover una idea positiva del idioma propiu de Siero ente los escolinos.

P’acabar, Fonsu Martín recordó que “cada cursu alcontrámonos problemes y dificultaes pa que los escolinos puedan matriculase n’asturianu como pa qu’agora un alcalde mos venga a falar de lo que ye meyor o peor. Como otros años, Iniciativa pol Asturianu ta’l serviciu de los pas y les mas que tuvieren dalgún tipu de problema a la hora de matricular a los estudiantes n’asturianu pa denunciar esta situación”.