Estes selmanes atrás l'Asociación de Trabayadores de la Normalización asoleyaba la murnia situación que viven los servicios de normalización llingüística puestos en marcha dende va más d'una década en dellos conceyos asturianos. Dende Iniciativa pol Asturianu solidarizámonos con estos trabayadores y pidimos tamién una situación estable de los servicios que permitan llevar a alantre polítiques llingüístiques organizaes y continuaes nel tiempu.

 

Estes instituciones son perimportantes pa la normalización de la llingua asturiana, yá que cada añu miles de ciudanos y cientos d'entidaes públiques y privaes, usen estos servicios pa sofitar l'apueste pol usu del asturianu na so actividá.

 

Ye por ello que solicitamos a la Conseyería de Cultura, responsable de les competencies de Política Llingüística, que ponga en marcha los convenios necesarios pa caltenelos nel tiempu, y a los conceyos, que se responsabilicen de los servicios de normalización como parte propia que son de la so alministración, destinando los recursos necesarios pa llevar alantre la so actividá ensin una dependencia absoluta de la financiación del Gobiernu d'Asturies, como pasa na mayor parte de los casos.

 

Estos servicios de normalización, inclusive nes circunstancies de precariedá presupuestaria y llaboral que viven, son ferramientes bien útiles pa la normalización del idioma nel ámbitu de los conceyos, mesmo de forma interna, na alministración, como faciendo serviciu directu a los ciudadanos.

 

Entrevista a Inaciu Galán sobre la situación de los servicios de normalización llingüística nos conceyos na SER Radio Asturies – Hoy por hoy 08/01/2015