Iniciativa pol Asturianu participó güei na rueda de prensa convocada nel Congresu de los Diputaos pa presentar la Proposición de Llei Orgánica de garantía del plurillingüismu y de los drechos llingüísticos de la ciudadanía énte les instituciones del Estáu, un testu lexislativu que busca asegurar que toles llingües oficiales y propies del mesmu del Estáu cunten con un marcu de reconocencia y usu efectivu na alministración estatal.
La organización asturiana destacó la relevancia del proyectu p’avanzar escontra un modelu dafechu respetuosu cola diversidá llingüística, señalando que la ciudadanía asturfalante lleva décades reclamando la oficialidá al igual que’l restu de llingües españoles. La propuesta lexislativa supón, nesti sentíu, un pasu significativu escontra la reconocencia real y prácticu d’esos drechos pa les llingües oficiales, pero tien qu’afondar tamién nes llingües con protección xurídica.
Na so intervención, Vítor Manuel Fernández, representante d’Iniciativa pol Asturianu consideró que “apostamos por iniciatives lexislatives como esta; pero recordamos qu’hai idiomes que tovía nun cunten cola reconocencia d’oficialidá nos sos respectivos Estatutos d’Autonomía, como l’asturianu o l’aragonés y por esta razón nun pueden quedar atrás”.
“La aprobación de esta norma contribuiría a nun xenerar divisiones esistentes ente comunidaes llingüístiques del Estáu, equiparando drechos hoy reconocidos pa les llingües cooficiales, pero tien que garantizar tamién un trato equitativo pal asturiano” apuntó Fernández.
Iniciativa pol Asturianu reiteró tamién el so compromisu col diálogu y la cooperación con otres entidaes y territorios plurilingües, col fin d’avanzar escontra una política estatal que reconoza, normalice y garantice l’exerciciu efectivu de los drechos llingüísticos de tola ciudadanía, independientemente de la llingua que falen.
La organización anima a los grupos parllamentarios a sofitar la Proposición de Llei y a siguir trabayando naa pluralidá llingüística del Estáu como un valor democráticu, cultural y social que tien de ser protexíu y garantizáu n’igualdá de condiciones, poniendo’l focu n’Asturies y Aragón, territorios que cuenten con un déficit de drechos nesta materia.
