La dirección d'Iniciativa pol Asturianu quier espresar el so sofitu a la familia, compañeros y amigos de Sergio Marqués, ex Presidente d'Asturies, recordando'l so compromisu cola llingua asturiana, que lu llevó a convertise nel únicu presidente qu'aprobó una Llei d'Usu del Asturianu nos más de trenta años d'autonomía asturiana.
Amás, Marqués defendió la necesidá de que l'asturianu fuera un idioma oficial n'Asturies, llevándolo nos programes políticos colos que concurrió a elecciones, participando nes manifestaciones pola oficialidá y al traviés de numberoses intervenciones en prensa.
Por ello ye un exemplu pa la clas política asturiana, na que tovía s'observen resistencies a normalizar la situación del asturianu. En pallabres del propiu ex Presidente, tendríemos de "volver a sentir arguyu de la nuesa llingua".
