Iniciativa pol Asturianu llamenta la perda de Félix Ferreiro pol so importante papel na puesta en marcha del enseñu de l’asignatura de Llingua Asturiana nel sistema educativu.
Félix Ferreiro yera miembru de l’Academia de la Llingua Asturiana y foi autor d’obres de gran importancia nel entamu de la presencia del asturianu nel sistema educativu, como’l Diccionariu Básicu de la Llingua Asturiana, que tuvo delles ediciones, o’l manuel Reciella, que redactó xunto a Pablo Xuan Manzano. Ferreiro tenía tamién obra lliteratia en gallego-asturianu y yera miembru habitual de xuraos de premios lliterarios como’l Fernán Coronas. Nos primeros años noventa foi xefe del Serviciu de Política Llingüística del Gobiernu d’Asturies.
Queremos acompañar nel dolor a la familia d’esti home que tan importante llabor tuvo na defensa y promoción de la cultura y la llingua asturianes, nun ámbitu de gran importancia como ye l’educativu.
Inaciu Galán, vocal de rellaciones institucionales, quixo tener un recuerdu especial con él, “ye un home que xestionó la política llingüística en momentos difíciles, onde había qu’abrir cuasi tolos caminos de cero”. “Tuvi la suerte de conocelu y compartir dellos xuraos del Premiu Fernán Coronas en Cadavéu y yera un home qu’animaba siempres a les nueves xeneraciones a siguir el camín, vamos echalu en falta”.
