Tres conocese’l cese definitivu de Francisco González Orejas al frente del ente públicu, Iniciativa pol Asturianu volvió incidir na necesidá de que la nueva dirección de la RTPA tea encabezada por un perfil qu’apueste de manera decidida pol aumentu de la presencia de la llingua asturiana y del eonaviego nes sos emisiones.
La organización sorraya que la radiotelevisión pública asturiana xuega un papel clave na normalización social de les llingües propies d’Asturies. Por ello, considera imprescindible que la persona qu’asuma la Dirección Xeneral tenga un compromisu firme cola defensa, promoción y difusión del patrimoniu llingüísticu.
Nesti sentíu, Iniciativa pol Asturianu denuncia la escasa presencia actual del asturianu y del eonaviegu na programación de la cadena, arrequexada, nel casu televisivu, a escasos tres minutos diarios nun resume dientro de los informativos de la tarde y a ún programa fechu íntegramente n’asturianu, y nel radiofónicu, a siete hores a la selmana.
Pa la entidá, la poca presencia del idioma nel ente resulta incompatible colos compromisos recoyíos na Carta Europea de les Llingües Rexonales o Minoritaries, asina como col espíritu de la Llei d’Usu y Promoción del Asturianu y cola voluntá mayoritaria de la sociedá asturiana espresada democráticamente. Tamién, el propiu mandatu-marco de la RTPA, onde se definen les llínies xenerales del mediu, anque resulta probe na cuestión llingüística, si fai dalgún avance y abre la puerta a que la negociación del contratu-programa ente’l gobiernu y la RTPA afite un porcentaxe de programación nes llingües propies. Esti cambéu anque ye escasu podría camudar la realidá d’angüaños d’ausencia y marxinalidá del idioma na radiotelevisión pública. El fechu de que’l mandatu-marco permita —anque nun obligue— fixar un porcentaxe de conteníos nes llingües propies significa que la cuestión dexa de ser puramente simbólica y pasa a formar parte del terrén de la negociación política y presupuestaria.
Por ello, ye necesario cuntar con el perfil comprometíu cola llingua asturiana na Dirección Xeneral que permita ‘dar la batalla’ pola mesma y consiguir nuevos espacios pal idioma na TPA na futura negociación del contratu-programa, con compromisos reales pa les llingües propies nel ente públicu y que seya capaz de situar el patrimoniu llingüísticu nun llugar central y dignu dientro de la programación de la RTPA.
La organización considera que la RTPA atópase nun momentu clave nel que resulta necesario garantizar una presencia digna del asturianu y del eonaviego nos medios públicos, na mesma llinia de lo qu’asocede n’otres comunidaes autónomes con llingua propia como ye’l casu de Galicia. Amás, Iniciativa pol Asturianu apuesta pol desenvolvimientu de conteníos diversos —informativos, culturales, educativos y d’entretenimientu— que permitan ampliar la ufierta de programación n’asturianu y n’eonaviegu a tolos públicos.
A xuiciu del colectivu, sería inconcebible que la dirección de la RTPA recayera nuna persona ayena a la realidá asturiana nes sos dimensiones política, social, cultural y llingüística. Los partíos con representación parlamentaria tienen la responsabilidá de consensuar una candidatura venceyada al país y plenamente consciente de la so realidá llingüística. Iniciativa pol Asturianu señala que les fuerces polítiques tienen una oportunidá pa revertir la situación actual. Recuerda amás que la oficialidá del asturianu llogró va unos meses un sofitu mayoritariu na Xunta Xeneral del Principáu d’Asturies, polo que considera incoherente sofitar una candidatura que nun tenga un compromisu claru col idioma.
Por too ello, la organización considera qu’una dirección sensible col patrimoniu llingüísticu permitiría convertir la RTPA nun pegoyu fundamental pa la normalización y difusión del asturianu, consolidándola como un mediu de referencia nel usu de les llingües propies.
