“Esti ye un exemplu de cómo esti idioma y esta reivindicación van ganando espacios y defensores de la llibertá llingüística n’Asturies”

“Ye un exemplu pa tola sociedá d’avance y de cómo se tien que trabayar en defensa del asturianu: pasu a pasu, ensin parar, con consensu y ensin xenerar tensiones nin divisiones”

“Dende la nuesa organización queremos agradecer el trabayu pola cultura y la llingua asturiana de tantos homes y muyeres escritores que cola so creación enriquecen lliterariamente al idioma”

UVIÉU, 19/09/2020. Iniciativa pol Asturianu felicita a l’Asociación d’Escritores d’Asturies pola so defensa de la oficialidá de la llingua asturiana dempués de l’asamblea celebrada güei n’Uviéu. Pa la entidá ye una mui bona noticia qu’esta asociación qu’agrupa a tantes persones qu’escriben y faen cultura dea un pasu tan importante como ye l’usu internu del asturianu como la defensa de la igualdá de los drechos llingüísticos de los y les falantes d’asturianu.

Pa la organización “esti ye un exemplu de cómo esti idioma y esta reivindiación van ganando espacios y defensores de la llibertá llingüística n’Asturies. Y munches vegaes reconocemos los pasos que se dan dende les instituciones, pero nun caemos en tantes entidaes como ye esti casu qu’apuesten pol asturianu”.

Dende Iniciativa pol Asturianu apuntóse tamién que “ye un exemplu pa tola sociedá d’avance y de cómo se tien que trabayar en defensa del asturianu: pasu a pasu, ensin parar, con consensu y ensin xenerar tensiones nin divisiones absurdes. Güei la entidá que representa a los y les escritores d’Asturies dio un pasu mui importante gracies al trabayu y esfuerciu previu de tantes persones”.

Iniciativa pol Asturianu quixo tamién tener un agradecimientu pa tolos y toles componentes de l’Asociación d’Escritores d’Asturies y añadieron que “dende la nuesa organización queremos agradecer el trabayu pola cultura y la llingua asturiana de tantos homes y muyeres escritores que cola so creación enriquecen lliterariamente al idioma. Porque con esi llabor aporten pesu al idioma y mantienen la creación lliteraria siguiendo la tradición de tantos sieglos y de tantes persones. De manera concreta, queremos felicitar tamién a Esther García pola so trayectoria, compromisu llingüísticu y por siguir como presidenta”.

P’acabar Iniciativa pol Asturianu ufrió la so collaboración pa cuelesquier actividá y campaña que se quiera entamar dende l’Asociación d’Escritores d’Asturies.