Iniciativa pol Asturianu tresllada’l so pesar pol fallecimientu del periodista, escritor y activista llingüísticu Damián Barreiro. L’asociación quier faer llegar nesti murniu momentu’l pésame a la so familia y a la Xunta Pola Defensa de la Llingua Asturiana, organización na que militaba.
Damián Barreiro nació n’A Estrada, en Pontevedra, nel añu 1984, pero treslladóse al conceyu d’Avilés onde dende bien mozu desendolcó un llabor importante na reivindicación llingüística, collaborando nuna montonera d’iniciatives de toa triba en favor del idioma. Escribió na revista Formientu, revista lliteraria moza nacida en Xixón nel añu 2006, onde espublizó dellos escritos. Caltuvo siempres un compromiso llingüísticu nos sos trabayos nel selmanariu Les Noticies y nel diariu dixital Asturies.com. Angüaño yera’l redactor de la estaya d’asturianu de l’axencia Europa Press, amás de collaborador n’otros medios, como l’Anuariu de la Música Asturiana.
Tamién destacó pola so faceta como ‘youtuber’. Al traviés de la canal ‘Horros & Frixuelos’ analizaba les conexones ente la cultura asturiana y la cultura pop contemporánea. Esti analís llevólu a trabayar en dellos ensayos que-y valieron pa ganar en trés ocasiones el Premiu Máximo Fuertes Acevedo, poles obres ‘Asturianía kitsch: decálogu de la cultura pop ástur’, ‘Caleya Sésamu: el papel de la televisión na tresmisión interxeneracional de la llingua’ y ‘Asturploitation’, amás del Premiu d’Ensayu «Fierro Botas», y el d’Investigación Llingüística de l’Academia de la Llingua Asturiana.
